धम्मवती गुरुमांयात विशेष धम्मपुजा

येँ (नेपालभाषा टाइम्स)- हनेबहःम्ह धम्मवती गुरुमांया हनाय् म्हिगः विशेष मंकाः धम्मपुजा देछायेगु ज्या जुल । थनया राष्ट्रिय सभागृहय् जूगु छगू ज्याझ्वःया दथुइ उपप्रधानमन्त्री लिसें गृहमन्त्री नारायणकाजी श्रेष्ठं वसपोलयात धम्मपुजापौ लःल्हासें सम्मान यानादीगु खः । वसपोल ९० दँय् क्यंगु लिसें प्रव्रज्या जुयाबिज्याःगु ७५ दँ क्यंगु लसताय् उगु ज्याझ्वः जूगु खः ।

ज्याझ्वलय् नेपाःया लागिं म्यान्मारया राजदूत ऊ नु उ, येँ मनपाया उपमेयर सुनिता डंगोल, नेवाः न्ह्यलुवा मल्ल के. सुन्दरपिंसं धम्मवती गुरुमां व वसपोलया शिक्षाया बारे बिचाः तयादीगु खःसा डा. रीना तुलाधरं गुरुमांया जीवनी कनादीगु खः ।

थेरवादया भिक्षुपिं, वज्रयानया गुर्जुपिं व महायानया लामापिंसं मंगल पाठ यासें न्ह्याकूगु उगु ज्याझ्वलय् ज्याझ्वःया संयोजक खेमावती गुरुमामं लसकुस यानाबिज्याःगु खः । ज्याझ्वलय् अमता गुरुमामं च्वयाबिज्याःगु ‘नेपालमा थेरवाद बुद्ध धर्म प्रचार प्रसारमा धर्मकीर्ति विहारको योगदान’ नांगु सफू विमोचन जूगु खःसा धर्मकीर्ति विहार संरक्षण कोषया कोषाध्यक्ष अजयरत्न स्थापितं ‘धम्मवती धम्म प्रशिक्षण परियोजना’ या घोषणा यानादीगु खः ।

ज्याझ्वःया शुरुइ धम्मवती गुरुमांयात येँ मनपाया मेयर बालेन्द्र साह लगायतं बाछा लायाः लसकुस याःगु खः ।