येँ मपापाखें मध्यम दूरीया यातायात संचालन यायेत कार्यदल गठन

येँ -येँ महानगरपालिकां ‘मध्यम दूरीया यातायात संचालन सम्बन्धी अध्ययन कार्यदल’ गठन याःगु दु । येँ महानगरया आः नकतिनि च्वंगु ६५ क्वःगु कार्यपालिकाया बैठकं मध्यम दूरीया सवारी संचालन अध्ययनया निंतिं कार्यदल गठन याःगु खः ।

महानगर प्रमुख विद्यासुन्दर शाक्यया अध्यक्षताय् च्वंगु कार्यपालिकाया बैठकं उपप्रमुख हरिप्रभा खड्गी श्रेष्ठया संयोजकत्वय् न्याम्हेसिया कार्यदल गठन याःगु खः।

पुलांगु बसपार्कयात उगु थासं चिइकाः खुल्लामंच तये हःगु खःसा आः अनं नं चिइकाः न्हूगु बसपार्कं संचालन यायेत धाःगु खः। वंगु बैशाख १६ गतेनिसें खुल्लामंचं बसपार्क चिइाः अनं ‘पिक एण्ड ड्रप’ जक याये दइगु व्यवस्था याःगु खः । महानगरं थुगु व्यवस्था कार्यान्वयनय् हयेधुंकाः मध्यम दूरीया यातायात व्यवसायीतय्सं न्हूगु बसपार्कं संचालन यायेत पायक मजूगु धासें मेगु व्यवस्था मजूतलेया निंतिं खुल्लामंचं हे यातायात संचालन याये दयेमाःगु माग याना वयाच्वंगु खः ।

येँ महानगर प्रमुख शाक्यं खुल्लामंचं बसपार्क चिइकेधुंकाः आः हाकनं उगु थासय् यातायात लित हये फइमखु धासें विकल्पयात कयाः अध्ययन यायेत कार्यदल गठन यानागु जानकारी बैठकय् बियादीगु खः । प्रमुख शाक्यं विकल्पया रुपय् व्यवसायीतय्सं छुं छुं विकल्प न्ह्यःने हःगु व उकियानापं कार्यदल अध्ययन याइगु खँ कनादीगु दु ।

यातायात व्यवसायीतय्सं मेगु व्यवस्था मजूतलेया निंतिं साविकया हे थासय् बसपार्क संचालन याये दयेमाःगु माग यासें बिउगु निवेदनयात कयाः सहलह यायेगु झ्वलय् महानगरं उकथंया निर्णय याःगु खः।

उपप्रमुख खड्गीया संयोजकत्वय् गठन याःगु कार्यदलय् २६ वडाअध्यक्ष ख्याम तिवारी, ३२ वडाअध्यक्ष नवराज पराजुली, सहरी सुव्यवस्था विभाग प्रमुख धु्रव काफ्ले, नगर प्रहरी उपरीक्षक धनपति सापकोटा सदस्यकथं च्वनादीगु दु । कार्यदलयात ट्राफिक प्रहरी व यातायात व्यवस्था विभागलिसे सहलह यानाः छवाःया दुने सुझाव पेश यायेत ई बिउगु दु ।

बैठकं सिटी मार्केटया शिलबन्दी यानातःगु थाय्यात उपभोग यायेगु सम्बन्धय् अध्ययन सिफारिस प्रतिवेदनया लिधंसाय् दछिया निंतिं बोलपत्र आह्वान सम्बन्धी सुचं पिथनेगु नं निर्णय याःगु दु । थ्व स्वयां न्ह्यः महानगरं खुल्ला प्रतिस्पर्धापाखें ठेक्का बीत बोलपत्र आह्वान याःगु खःसां प्रस्ताव धाःसा मवःगु खः ।