ने. सं. ११४४ ञलाथ्व पुन्हि - येँया: पुन्हि

फास्ट ट्राय्क डीपीआर मदयेकुसे न्ह्यानाच्वन

येँ – येँय् नं तराई वनेत सःतिगु आयोजना कथं कयातःगु येँ–निजगढ फास्ट ट्राय्क दयेकेगु ज्या सेनां तीव्र रुपं न्ह्याकाच्वंगु दु । सेनां डीपीआर तयार मयासे धमाधम ज्या न्ह्याकाच्वंगु खः । सेनां क्वःछिनातःगु इलय् आयोजनाया ज्या क्वचायेकेमाःगु धासें डीपीआर तकं मदयेक ज्या न्ह्याकाच्वंगु खः ।

क्वःछिनातःगु ई २०७९ या दुने आयोजनाया ज्या सिधयेकाः सरकारयात लःल्हायेगु कथं ज्या जुयाच्वंगु खँ धाःगु दु । सेनां डीपीआर दयेकेगु जिम्मा कोरियाली कम्पनीयात बिउगु खःसा कम्पनीं थ्वहे वइगु माघया दुने डीपीआर तयार यानाः सेनायात बीगु सम्झौता जूगु खः ।
सेनां दयेकाच्वंगु द्रुतमार्गयात कयाः आपालं विवाद ल्यनाच्वंगु दुसां सेनां थःगु ज्या धाःसा निरन्तर यानाच्वंगु दु ।

द्रुतमार्गया ‘जिरो प्वाइन्ट’ आतकं निर्धारण यायेफयाच्वंगु मदु । सेनां ख्वनाय् ‘जिरो प्वाइन्ट’ दयेकेगु कथं ज्या यानाच्वंगु दुसा स्थानीय जनतां धाःसा सरकारं थःपिंत बिउगु जग्गाया मुआब्जा चित्त बुझे मजू धासें उकियात अप्वयेकाः जक फास्ट ट्राय्क दयेकेगु ज्या न्ह्याकेमाःगु माग यानाच्वंगु दु ।

लिसें स्थानीय जनतां फास्ट ट्राय्क दयेकेगु झ्वलय् ख्वनाय् लुयावःगु पुरातात्विक संरचनाया संरक्षण यायेमाःगु माग नं याना वयाच्वंगु दु ।
थ्व हे झ्वलय् सेनां फास्ट ट्राय्कया ज्या न्ह्याकेधुंकाः थुगु दँय् यायेमाःगु ज्याया ९५ प्रतिशत प्रगति जूगु विवरण बिउगु दु ।

सेनाया कथं थुगु दँय् १९ हजार सिमा पालेगु ज्या क्वचायेधुंकूगु दुसा लक्ष्य कथं क्याम्प, सतक, जग्गा अधिग्रहण व डीपीआर दयेकेगु सम्झौताया ज्या पूवंकेधुंकूगु दु । चालु आर्थिक दँय् सेनां ५४ किलोमिटर सतक दयेकेगु ज्या क्वचायेके धुंकूगु दु ।