एसइइया लिच्वः साउन २५ य्

येँ- माध्यमिक शिक्षा परीक्षा (एसइइ)या या लिच्वः थ्व हे साउन २५ गतेया दुने वइगु जूगु दु । राष्ट्रिय परीक्षा बोर्डया कथं २०७७ सालया एसइइ परीक्षाया लिच्वः पिकायेगु निंतिं थौंकन्हय् धमाधमा लिच्वः रुजु यायेगु ज्या जुयाच्वंगु दु ।

परीक्षा नियन्त्रक रुद्र अधिकारीयाकथं थौंकन्हय् विद्यार्थीतय् लिच्वः रुजु यायेगु ज्या जुयाच्वंगु व वइगु शुक्रवाःतकया दुने थ्व ज्या क्वचायेकाः वयां छवाःया दुने लिच्वः पिथनेगुकथं तयारीइ न्ह्यानाच्वंगु दु । न्हापां साउनया लिपांगु दिं तकया दुने लिच्वः सार्वजनिक यायेकथं न्ह्याः वनाच्वंगु बोर्डं आः वयाः न्ह्यः हे लिच्वः पिकायेकथं तयारी यानाच्वंगु वय्कलं कनादिल ।

बोर्डं एसइइ परीक्षाया लिच्वः पिथनेगु निंतिं देय्या ७७ गुलिं जिल्लाया ब्वँमिपिगिु लिच्वः मुंकाः विवरण कायेधुंकूगु दु । २०७७ सालया एसइइ परीक्षाय् न्यागू लख झिंन्हय्द्वः ब्वँमिपिंसं रजिष्ट्रेसन फाराम भरे याःगु खः ।