चीन–अमेरिका वार्ता सकारात्मक

अमेरिका व चिनिया अधिकारीतय् दथुइ बेइजिङ्गय् जूगु न्हापांगु चरणया व्यापार वार्ता स्वन्हुलिपा बुधवाः क्वचाःगु दु । अमेरिकी प्रतिनिधितय्सं वार्ता सकारात्मक रुपं न्ह्याःवंगु खँ धाःगु दु । व्यापार वार्ताया निंतिं वंगु सोमवाः अमेरिकी अधिकारीत बेइजिङ्ग थ्यंकःवंगु खः ।

अमेरिकी राष्ट्रपति डोनाल्ड ट्रम्प व चिनिया राष्ट्रपति सी जिनफिङ्ग दुई व्यापार तनाव अन्त्त यायेगु निंतिं डिसेम्बर १ तारिख निसें स्वलाया निंतिं व्यापार युद्धविराम यायेगु सहमति जूगु खः । थ्व सहमति लिपा न्हापांखुसी सोमवाःनिसें वार्ता सुरु जूगु खः । निगू तःधंगु अर्थतन्त्र दथुइ जुयाच्वंगु व्यापार युद्धयात दिकाः सुरु जूगु वार्तां यानाः अमेरिका व एशियाया बजारय् धाःसा सुधार खनेदुगु दु ।

बेइजिङ्ग वार्ताय् सहभागी जुयादीम्ह अमेरिकी व्यापार तथा कृषि मामिला उपमन्त्री टेड म्याककीन्नीं वार्ता तसकं सकारात्मक जूगु प्रतिक्रिया बियादीगु दु । राष्ट्रपति ट्रम्पं नं मंगलवाः हे ट्विट यासें चीनय् जारी व्यापार वार्ता तसकं बांलाक न्ह्याः वनाच्वंगु खँ धयादीगु दु ।

अमेरिकी उपव्यापार प्रतिनिधि जेफ्री गेरिसया नेतृत्वय् थुगु थ्व वार्ता पुचः मंगलवाः हे लिहां वनीगु ज्याझ्वः तयातःगु खःसा वार्ता छन्हु थप न्ह्याःवंगु खः ।वार्ता सकारात्मक धाःसा चिनिया व अमेरिकी निगुलिं पक्षं वार्ताया विस्तृत विवरण धाःसा पितबिउगु मदुनि । मेखे अमेरिकी वाणिज्यमन्त्री विल्बर रोसं अमेरिकी टेलिभिजन सीएनबीसीयात बिउगु अन्तर्वार्ताय् निगू देय् दथुइ न्हूगु सम्झौता जुइगु सम्भावना अप्वः दुगु खँ धयादीगु दु ।

 

सम्बन्धित बुखँ

LEAVE YOUR COMMENTS