केरुङ–येँ रेलमार्गया निंतिं नेपालं सहुलियत त्यासा स्वीकार याइगु
येँ – नेपालं केरुङ–येँ रेलमार्ग दयेकेगु निंतिं सहुलियत त्यासा स्वीकार यायेगु खँ स्पष्ट याःगु दु । चीन भ्रमणय् झायाच्वनादीम्ह प्रधानमन्त्री केपी ओली व चिनियाँ राष्ट्रपति सि जिनपिङ दथुइ केरुङ–येँ रेलमार्ग बारे सहलह जूगु खः । सहलहय् सिं केरुङं येँतक रेलमार्ग याकनं स्वाइगु विश्वास प्वंकादीगु खः ।
ओली व सि नापलायेधुंकाः परराष्ट्रमन्त्री प्रदीप ज्ञवालीं केरुङ–येँ रेलमार्ग अनुदानय् दयेकेगु कुतः यानाच्वनागु खँ कनादीगु दु । वय्कःया कथं सतप्रतिशत अनुदानय् चीन तयार मजुल धाःसा छुं अनुदान व छुं त्यासाया हिस्सा स्वीकार यायेफइगु खँ धयादीगु खः । अथेहे चीनं छुं अनुदान बीगु व नेपालं थःगु पाखें नं लगानी यायेगु सम्बन्धी मोडालिटी बारे सोचे यायेफइगु खँ नं धाःगु दु ।
चीनयात केरुङ–येँ रेलमार्गया डीपीआर दयेकेगु प्रक्रिया न्ह्यःने न्ह्याकेत सहमत याकेगु निंतिं भौतिक तथा पूर्वाधार मन्त्री रघुवीर महासेठ व सचिव मधुसुदन अधिकारी छुं न्हिं न्ह्यः हे चीनय् वंगु खः ।चीनं शतप्रतिशत अनुदानय्् रेल दयेके मफइगु स्पष्ट अडान तयावयाच्वंगु दु ।
रेलमार्ग दयेकेगु मोडालिटी क्वःमजिउगुलिं डीपीआर दयेकेत नं चीन तयार मजूगुलिं नेपालं सहुलियत त्यासा स्वीकार यानाःसां सहमति यायेत्यंगु खः । आः नेपालं नं छुं अनुदान व छुं त्यासा कयाः जूसां नं केरुङ–येँ रेलमार्ग दयेकेगु प्रक्रिया न्ह्यःने न्ह्याकेगु निष्कर्षय् थ्यंगु संकेत परराष्ट्र मन्त्री ज्ञवालीं बिउगु दु ।
LEAVE YOUR COMMENTS