ने. सं. ११४४ कौलाथ्व पारू - नःलास्वनेगु

नीन्यादँया दुने याःगु थीथी उपलब्धी

पद्मावती बचत तथा ऋण सहकारी संस्थां थःपिनि नीन्यादँया दुने याःगु थीथी उपलब्धी छक्वः न्ह्यब्वयेगु कुतः यानाच्वना । दकलय् न्हापां थुगु संस्थां संस्थाया दुजः व थःपिनि कार्यक्षेत्र लानाच्वंगु थाय्या दुजःतय्त प्राथमिक उपचार सेवा प्रदान यायेगु ताः तयाः विक्रम संवत् २०५७ सालं स्वास्थ्य केन्द्र स्थापना यानाः सेवा यानाच्वंगु दु ।

उगु केन्द्रपाखें नियमित रुपं क्लिनिक सेवा, थीथी स्वास्थ्य शिविर चले यायेगु व थीथी नखः चखः जुइगु इलय् त्वाःत्वालय् वनाः हे घुम्ती सेवा सञ्चालन यायेगु यानाच्वंगु दु । आः वया स्वास्थ्य लागायात तःचाः यायेगु झ्वलय् प्याथोलोजी ल्याब नं चले यायेगु यानाच्वंगु दु ।
संस्थाया दुजःत मध्ये नं जेष्ठ दुजःतय् विशेष कथं ज्या यानाच्वंगु दु ।

संस्थाय् अलग्ग छगू जेष्ठ नागरिक उपसमिति नीस्वनाः लय् लय् पतिकं आध्यामिक प्रवचन, स्वलाय् छक्वः तीर्थस्थल भ्रमण, दँय्दसं तीर्थस्थल भ्रमण याना वयाच्वंगु दु । उलि जक मखु दँय् दसं चैत १ गतेकुन्हु बृद्ध वार्षिक समारोह कथं जेष्ठ नागरिकतय्त सम्मान यायेगु ज्या नं याना वयाच्वंगु दु ।

संस्थां मिसा व ल्याय्म्हतय्त लक्षित यानाः ज्याझ्वः न्ह्याकेत ल्याय्म्हत नीन्याम्ह व ल्यासेत नीन्याम्ह यानाः समूह नं नीस्वनातःगु दु । उगु हे पुचःपाखें मिस्त व ल्याय्म्ह दुजःतय्त सीपमुलक, आयमुलक व रोजगारमुलक तालिम, गोष्ठी व सहलह ज्याझ्वः याना वयाच्वंगु दु । आः महिला २५ पुचः अन्तर्गत हे सुपथ उपभोग्य सामग्री पसः व पद्मावती हस्तकला शोरुम नं सञ्चालन याःगु दु ।

संस्थाया दुजःतय्गु जीवन सुरक्षा लागाय् सेवा यायेगु ताः तयाः बीमा कम्पनीत नापं सहलह यानाः बीमा सेवा प्रदान याना वयाच्वंगु दु । सदस्य जीवन बीमा, ऋण जोखिम बीमा सेवापाखें जीवन सुरक्षाया नाप नापं ऋणी दुजःतय् आर्थिक सुरक्षा तकं प्रदान याना वयाच्वंगु दु । सदस्यतय्गु बीमा सुविधालिसे स्वापू तयाः बीमा बचत सेवा प्रदान याना वयाच्वंगु दु गुगु सदस्यतय् थःगु आर्थिक क्षमता कथं हे जूसां नियमित बचत यानाः बीमा प्रिमियम भुक्तानी यायेफइ ।

सदस्यतय्त संस्थां थीथी शीर्षकय् ऋण सेवा प्रदान याना वयाच्वंगुली रोजगारी व आययात मध्यनजर यानाः प्राथमिक ऋण प्रदान याना वयाच्वंगु दु । साना तथा घरेलु ऋण, दैनिक बचत ऋण, औद्योगिक ऋणत विशेष सहुलियत ब्याज दर व म्हो इलय् ऋण प्रदान याना वयाच्वंगु दु । सदस्यं ऋणया साँवा ब्याज नियमित कथं किस्ताबन्दीं पुले फइगु व संस्थाया कर्मचारी नं छेँय् छेँय् वनाः हे जूसां मुंकः वइगु सुविधा नं बियाच्वंगु दु ।

संस्थां थीथी कथंया बचत सेवात विकास यानाः सदस्यतय्गु बचत यायेगु बानीइ सुधार यानाच्वंगु दु । न्यादँया विशेष आवधिक बचत, गृहणी बचत, खाद्यान्न बचत, धार्मिक तथा पर्यटन बचत आदि थीथी बचत सेवात सदस्यतय्सं उपयोग याये खनी । सहकारी शिक्षा मदयेकं सहकारी संस्था पूर्ण जुइ मखु धइगु मान्यता कथं संस्थां थःगु स्थापना कालंनिसें हे शिक्षा शिविरयात नियमित याना वयाच्वंगु दु ।

संस्थाया सञ्चालक समितिया दुजः, कर्मचारी व सदस्यतय्त लक्षित यानाः नियमित रुपं थीथी कार्यगत, शिक्षामुलक, जागरणमुलक शैक्षिक ज्याझ्वःत न्ह्याका वयाच्वंगु दु । नापं थीथी कथंया राष्ट्रिय, अन्तर्राष्ट्रिय व जिल्लास्तरीय संघ संस्थां ग्वसाः ग्वइगु तालिम व गोष्ठीइ नं मदिकं सहभागिता क्यनेगु याना वयाच्वंगु दु ।

थुगु संस्थां न्हूपिंत सदस्यता आह्वान यायेगु इलय् नं निवेदन बीपिं सम्भावित सदस्यतय् लागिं प्रारम्भिक सदस्य कक्षा सञ्चालन व उगु कक्षाय् सहभागी जूपिं निवेदकतय्त जक सदस्यता प्रदान यायेगु नीति अबलम्बन याना वयाच्वंगु दु । सदस्यतय्त संस्थाया गतिविधि, सूचना व जानकारीमुलक सामग्रीत सुचित यायेगु ज्याय् थीथी माध्यम छ्यला वयाच्वंगु दु ।

सदस्यतय्त संस्थाया गतिविधि, सहकारी गतिविधि व जानकारी याकेगु निंतिं नियमित रुपं पद्मावती बुलेटिन नं पिथनाच्वंगु दु । सदस्यतय्त स्वापू तयेगु ल्याः नापं दुजः म्हसीका सफू, वार्षिक क्यालेन्डर, थीथी अवसरय् लुमन्ति पौ आदि पिथनेगु ज्याय् संस्था मदिक्क जुयाच्वंगु दु ।

संस्थां सूचना प्रविधिया उपयोग यानाः संस्थाया कार्यक्षमता अप्वयेकेत मदिकं लगे जुयाच्वंगु दु । संस्थाया न्हिथंया कार्यगत क्षमता अभिबृद्धि यायेत आधुनिक उपकरणत न्यानाः उपयोग याना वयाच्वंगु दु । संस्थाया सुचं पिथनेत वेबसाइट तकं व्यवस्था यानाः ज्या न्ह्याका वयाच्वंगु दु । अथेहे संस्थाया अलग्ग हे मोबाइल एप नापं दयेकाः सदस्यतय्त संस्थाया बारे जानकारी बीगु, संस्थाया गतिविधि, सदस्यतय्गु स्वापू विवरण तकं बीगु ज्या अःपुक याना वयाच्वंगु दु ।

पद्मावती सहकारी क्षेत्र दुने मेमेगु संघ संस्थात नापं आत्मीय व सहभागी स्वापू नीस्वनेगु ज्यायात तब्या यायेत सहकारी दथुइ ग्वाहालि यायेगु ज्या याना वयाच्वंगु दु । थथे स्वापू तब्याकेगु हे झ्वलय् राष्ट्रिय लागायात हाचां गायाः अन्तर्राष्ट्रिय संघसंस्थातय् दथुइ तकं पद्मावतीं स्वापू अप्वयेका यंकूगु दु ।

थ्वयां न्ह्यः हे जापान, थाइल्याण्ड, श्रीलंका थेंज्याःगु देसय् भ्रमण याःगु व उगु देशं वःपिं सहकारीकर्मित नाप सहकार्य यायेगु अवसर तकं चूलाकूगु दु । २०७३ सालय् नेपालं थाइल्याण्डया सहकारी संस्थाय् भ्रमण व अन्तक्र्रिया ज्याझ्वः तकं यानाः सहकारी दथुइ अन्तराष्ट्रियस्तरया अनुभव कालबिल यायेगु ज्या तकं जूवंगु दु ।

भौतिक पूर्वाधारय् विकास यानाः संस्थां थःगु हे भवनपाखें सेवा प्रदान याना वयाच्वंगु दु । नापं संस्थाया ज्या तब्या याना वनेगु झ्वलय् गुथि छेँ, टोल सुधार समिति भवन नापं उपयोग याना वयाच्वंगु दु । हाल संस्थाया नियमित कार्य सञ्चालन, पद्मावती स्वास्थ्य केन्द्र सञ्चालन, सुपथ उपभोग्य सामग्री पसः, पद्मावती हस्तकला शोरुम न्ह्याकूगु दु ।

दँय्दसं संस्थां वार्षिक कार्ययोजना विकास यानाः ज्या न्ह्याका वयाच्वंगु दु । थीथी कार्ययोजनापाखें वार्षिक योजना आह्वान यानाः उगु योजनाया अपरेशन क्यालेन्डर दयेकाः तःमुँज्यापाखें स्वीकृति यायेगु नियम दयेकूगु दु । नापं त्रिवार्षिक रणनीतिक योजना दयेकाः उगु हे संस्थाया लक्ष हासिल याना वयाच्वंगु दु ।

सदस्यतय्त बचत व ऋण सेवा न्हिया–न्हिथं सुथय् १० बजेनिसें ५ बजे तकं न्हिया न्हिथं प्रशासन सञ्चालन यानाः अत्याधुनिक सेवा प्रदान याना वयाच्वंगु दु । पूर्ण विद्युतीय ब्याकअप, कम्प्युटरपाखें चुस्त दुरुस्त प्रशासन व्यवस्था, बैंकिङ सेवा प्रदान यानाच्वंगु दु । हाल प्रशासनिक ज्या संस्थाया ज्याकू पद्मावती महाविहारया दिपंकर पाः गुथि भवनय् न्ह्यानाच्वंगु दु ।

संस्थाया बिस्तारित कार्यक्षत्र कथं संस्थाया सेवा विस्तार यायेत यलया प्रमुख थासय् सेवा केन्द्र नीस्वनेगु योजना दयेकूगु दु । सदस्यतय्त संस्थापाखें सेवा चूलाके अःपुकेगु निंतिं सदस्यतय् चाप अप्वःगु थाय् क्वःछिनाः सेवा केन्द्र नीस्वनेगु जुइ । संस्थां ज्याया लागा तब्या याना वनेत अधिक क्षमता दुगु बहुउद्दश्यीय सहकारी भवन दयेकेगु लक्ष्य तःगु दु ।

उगु भवनपाखें हे आः धमाधम सेवा प्रदान यायेगु सफल जुइसा सेवा तब्या याना वनेगु ज्या नं ताःलाइगु खनेदु । संस्थां आर्थिक सेवाया नाप नापं आः स्वास्थ्य सेवा, उपभोग्य सामग्री सेवा, शैक्षिक सेवा व सुविधा सम्पन्न भौतिक पूर्वाधारत नं विकास याना वनीगु जूगु दु ।