नेपालय् ६ प्रतिशत आर्थिक वृद्धदर जुइगु विश्व बैंकया प्रक्षेपण

येँ –  विश्व बैंकया छगू अध्ययनं सन् २०१९–२० या दँय् नेपालं ६ प्रतिशत आर्थिक वृद्धिदर चूलाकीगु खनेदुगु दु । विश्व बैंकं याःगु अध्ययन कथं नेपाः दक्षिण एशियाय् अप्वः आर्थिक वृद्धिदर हासिल याइगु देय् मध्येय् स्वंगूगु थासय् लाः । दक्षिण एशियाया देय् मध्ये दकलय् अप्वः भारतं ७.५ प्रतिशत बृद्धिदर चूलाकीगु विश्व बैंकया प्रक्षेपण दुसा थ्व धुंकाः बंगलादेशं ७.३ प्रतिशतया वृद्धिदर चूलाकी ।

विश्व बैंकं याःगु अध्ययन कथं नेपाः दक्षिण एशियाय् अप्वः आर्थिक वृद्धिदर हासिल याइगु देय् मध्येय् स्वंगूगु थासय् लाः

६ प्रतिशतया वृद्धिदर सहित नेपाः स्वंगूगु थासय् दु । विश्व बैंकया कथं समग्र दक्षिण एशियां धाःसा थ्व आर्थिक दँय् मुक्कं ७.१ प्रतिशत आर्थिक वृद्धिदर चूलाकी । विश्व बैंकं पितबिउगु क्षेत्रीय आर्थिक प्रतिवेदनय् उच्च आर्थिक विकासया निंतिं धाःसा निर्यातयात प्रवद्र्धन यायेमाःगु खँ धयातःगु दु । थ्व क्षेत्रया देय्त अप्वः यानाः आन्तरिक बजारया माग कथं जक चले जुयाच्वंगु धासें निर्यात व्यापार वृद्धि यानाः व्यापार घाटा म्हो यायेमाःगु व चालु खाता नोक्सान म्हो यायेमाःगु खँ नं प्रतिवेदनय् न्ह्यथनातःगु दु ।

विश्व बैंकं दक्षिण एशियायात तीव्र आर्थिक विकास जुयाच्वंगु क्षेत्र कथं स्वयाच्वंगु खँ नं प्रतिवेदनय् न्ह्यथनातःगु दु । विश्व बैंकया कथं नेपाःया आर्थिक वृद्धिइ पर्यटन व उत्पादन क्षेत्रया् मू योगदान दइगु खँ धाःगु दु । ‘पर्यटक अप्वया वःलिसे सेवा क्षेत्रय् बल्लाःगु वृद्धि व देय्या हे तःधंगु सिमेन्ट कारखानां थगुने निसें उत्पादन सुरु यायेवं उत्पादन क्षेत्र नं बल्लाःगु खनेदु’ विश्व बैंकया प्रतिवेदनय् धयातःगु दु ।

 

सम्बन्धित बुखँ

LEAVE YOUR COMMENTS