थनिंनिसें लुम्बिनीइ बुद्धिष्ट मार्ट

हेटौंडा – बुद्ध जन्मभूमि लुम्बिनीइ थनिंनिसें अन्तर्राष्ट्रिय बुद्धिष्ट ट्राभल मार्ट शुरु जूगु दु । कपिलवस्तुया तिलौराकोट, निग्लीहवा, कुदान, सगरहवा व नवलपरासीया रामग्राम क्षेत्रयात अन्तर्राष्ट्रिय पर्यटन व्यापारया मुख्य प्याकेजय् दुथ्याकेत ग्वाहालि यायेगु ल्याखं उगु बुद्धिष्ट मार्ट जू वनाच्वंगु खः ।

बुद्धिष्ट ट्राभल मार्टपाखें आन्तरिक व बाह्य बुद्ध सर्किटया प्रवद्र्धन व व्यापारय् तिवः जूवनीगु विश्वास कयातःगु दु । नेपाल ट्राभल्स एण्ड टुर्स एशोसियसन (नाट्टा)या अध्यक्ष सीएन पाण्डें विश्वन्यंकंया बुद्धिष्ट सर्किट छगू हे कथंया प्याकेज तयार यायेगु ल्याखं तयारी जुयाच्वंगु जानकारी बियादिल ।

वय्कलं लुम्बिनी व देवदह, कुदान, कपिलवस्तु, सगरहवा, निग्लीहवा, नवल परासीया रामग्रामसहितया आन्तरिक बुद्धिष्ट सर्किट व भारतया बोधगया, राजगीर, सारनाथ, कुशीनगरयात स्वाकाः बाह्य बुद्धिष्ट सर्किट दयेकेगु नं कनादिल । नेपाल पर्यटन बोर्डया कार्यकारी प्रमुख अधिकारी दीपकराज जोशीं बुद्धिष्ट सर्किट मार्ट ज्याझ्वलं लुम्बिनीयात म्हसीकेत ज्याझ्वः फलदायी जुइगु विश्वास प्वंकादिल ।

अथे हे नाट्टाया वरिष्ठ उपाध्यक्ष लिसें ज्याझ्वःया मूल आयोजक समितिया सदस्य सचिव अच्युत शर्मां गुरागाइं नं ज्याझ्वलं पर्यटन बजारय् लुम्बिनीया महत्वयात अप्वयेकीगु दावी यानादिल ।प्रधानमन्त्री केपी शर्मा ओली थौं विहीवाः लुम्बिनीइ जुइगु उलेज्या यानादीगु व ज्याझ्वलय् संस्कृति, पर्यटन तथा नागरिक उड्डयन मन्त्री रवीन्द्रप्रसाद अधिकारी, प्रदेश नं. ५ या मुख्यमन्त्री शंकर पोखरेल लगायतं संबोधन याइगु ज्याझ्वः तयातःगु दु ।