रविन्द्रराज ताम्रकारं यल उद्योग वाणिज्य संघया अध्यक्षय् उम्मेदवारी बीगु
यल (नेपालभाषा टाइम्स)÷ यल उद्योग वाणिज्य संघया पुलांम्ह वरिष्ठ उपाध्यक्ष रविन्द्रराज ताम्रकारं वइगु न्हूगु कार्यसमितिया निंतिं अध्यक्ष पदय् उम्मेदवारी बीगु जूगु दु । यल उद्योग वाणिज्य संघं वि.सं. २०५१ सालय् दुजः जुसां निसें थीथी पदय् च्वनाः ज्या याना वयाच्वनादीम्ह वय्कः अजमान जोशीया नेतृत्वय् दुगु कार्यसमितिया प्रथम उपाध्यक्ष व सविन श्रेष्ठया नेतृत्वय् जूगु कार्यसमितिइ वरिष्ठ उपाध्यक्ष जुयादीधुंकूम्ह खः ।
वय्कःया पुस्तौ पुस्तानिसें सिजः, लीया बसजाः व्यवसाय लिसे संलग्नपिं खःसा वय्कलं नं थःपिनि पूर्खाया ज्यायात निरन्तरता बियाः हस्तकला
क्षेत्रया विकास लिसें थीथी सामाजिक ज्याय् महत्वपूर्ण भूमिका म्हिता वयाच्वंगु दु । वय्कः ताम्राकार समाजय् निगू कार्यकाल अध्यक्ष जुयाः समाजमार्फत यलया जातीय समाज, खलःपुचः दथुइ समन्वय यानाः भाय्, संस्कृति संरक्षणया ज्याय् नं निरन्तर लगे जुयाच्वनादीम्ह खः ।
यल उद्योग वाणिज्य संघया तःमुँज्या वइगु असोज १९ व २० गते जुइत्यंगु दु । थःगु जीवनया अधिकांश ई ब्यापार व्यवसायय् लगे जुयाः २८ दँ तक संघय् सेवा यायेधुनागुया अनुवभं संघयात अझ च्वन्ह्याकेगु ताः तयाः थम्हं उम्मदेवारी बीत्यनागु खँ भाजु ताम्रकारं धयादीगु दु ।
LEAVE YOUR COMMENTS