फागुननिसें नियमित मौसमी बेलुन

येँ – वइगु फागुननिसं नियमित रुपं मौसमी बेलुन संचालन यायेगु तयारी याःगु दु । देय्या मौसमी सूचना प्रणालीयात व्यवस्थित, प्रभावकारी व विश्वसनीय दयेकेत फागुननिसें बेलुन उडानया निंतिं आवश्यक तयारी जुयाच्वंगु मौसम विभाग विभागं जानकारी बिउगु दु । उर्जा, जलस्रोत व सिँचाइ मन्त्रालय अन्तर्गतया विभाग, त्रिभुवन विश्वविद्यालय, जल तथा मौसम विज्ञान केन्द्रीय विभागया सहकार्यय् वंगु असार ६ गतेनिसें मौसमी बेलुन उडानया परीक्षण याःगु खः ।

विश्व बैंकया ग्वाहालिं नेपाःया मौसमी सूचना प्रणालीइ सुधार व आधुनिकीकरणया निंतिं उगु मौसमी बेलुने उडानया तयारी याःगु खः । वंगु असारय् न्हापांगु चरणया परीक्षण लछि लिपा हे बन्द जूगु खः । उगु इलय् बेलुन उडानया निंतिं आवश्यक हाइड्रोजनया ग्यास उत्पादन याइगु जेनेरेटरया निंतिं मेगु ग्यासया अभाव जुइवं उकियात बन्द याःगु खः । आः बेलुन उडानया निंतिं माःगु थासय् मेमेगु नं पूर्वाधार निर्माण जुयाच्वंगु व लछिया दुने सिधइगु जानकारी विभागं बिउगु दु ।