डा. तुलाधरयात नेवाः संकिपाकःमिपिंत विभाजित यायेत्यंगु द्वपं

येँ (नेपालभाषा टाइम्स)- छम्ह हे संरक्षकं नेपालभाषा संकिपा सम्बन्धी दछिया दुने निगू संस्था चायेकेवं विवाद ब्वलंगु दु । नेवाः संकिपा वि कास यायेगु ताः तयाः नेपालभाषा सिनेमा विकास केन्द्र संस्था चायेकेवं थ्व विवाद सतहय् वःगु खः ।

बेलायतय् च्वना वयाच्वंम्ह डा. शान्तवीर सिंह तुलाधरं दछि न्ह्यव जक नेपाः वयाः थःगु संरक्षकत्वय् हृदयप्रसाद मिश्रया अध्यक्षताय् नेपालभाषा संकिपा संघ चायेकूगु खः । तर दछि लिपा हे थुगु संघया हे छम्ह दुजः आर्यम नकःमिया नेतृत्वय् नेपालभाषा सिनेमा विकास केन्द्र चायेकूगु खः । थुगु संस्थाया संरक्षक नं भाजु तुलाधर हे जुयाच्वंगु दु । छगू संस्था चायेकाः छुं हे ज्या मयासे हाकनं मेगु संस्था चायेकाः नेवाः संकिपाकःमितय्त हे विभाजन यायेत स्वःगु खँ संघं छगू विज्ञप्ति पिकयाः धाःगु दु । संघं पिकाःगु वक्तव्य थुकथं दु–

नेपालभाषा संकिपा संघया प्रेस वक्तव्य
नेवाः संकिपाया विकास यायेगु ताः तयाः आः नकतिनि हे ‘नेपालभाषा सिनेमा विकास केन्द्र’ नां तयाः छगू न्हूगु संस्था चायेकल धकाः पिहां वःगु समाचारप्रति थुगु ‘नेपालभाषा संकिपा संघ’ या ध्यानाकर्षण जूगु दु ।

न्हू गठन जूगु ‘केन्द्र’ या नां व उद्देश्य थुगु संघलिसे ज्वःलाःगु जक मखु, थुकिया गठन समेत थुगु हे संघया सक्रिय संरक्षक डा. शान्तवीर सिंह तुलाधरजुया संरक्षकत्व व संघया हे छम्ह दुजःया नेतृत्वय् जूगु धकाः समाचारय् उल्लेख जुयाच्वंगु जुयाः जिमिगु ध्यानाकर्षण जूगु खः ।

थ्वहे विषययात कयाः थौं आकाझाकां च्वंगु संघया मुँज्यां थ्व सम्बन्धय् स्पष्ट जुइया लागिं संघया सक्रिय संरक्षक डा. तुलाधरयात छुं न्ह्यसः छ्वयेगु निर्णय जूगु दु । वय्कःयात छ्वयागु न्ह्यसः थुकथं दु –

न्ह्यसः १) नेपालभाषा संकिपाया विकास यायेगु ताः तयाः थनिं दछि न्ह्यः तिनि छिगु हे पहल व छिगु हे सक्रिय संरक्षकत्वय् ‘नेपालभाषा संकिपा संघ’ गठन जूगु खः । लुमंकेबहः जू, थुगु संघपाखें ज्या न्ह्याकेया लागिं छिं प्यंगू करोड तका दां मुंकेगु बचं नं बियादीगु खः । तर थुगु संस्था अस्तित्वय् दयेक दयेकं हे थुगु संस्थालिसे छुं सहलह तकं मयासे थःगु हे संरक्षकत्वय् वहे उद्देश्यया मेगु संस्था गठन

यायेमाःगुया कारण छु खः ?
न्ह्यसः २) नेपालभाषा ख्यलय् संकिपाकःमिपिनि ल्याः तसकं म्हो जक दु । थ्व म्हो जक दुपिं संकिपाकःमिपिंत छथाय् हयाः छधी यायेमाःम्ह छि थेंज्याःम्ह न्ह्यलुवां छगू संस्था दयेक दयेकं वहे संस्थाया छम्ह दुजःया नेतृत्वय् हानं मेगु संस्था चायेकाः दुपिं नेवाः संकिपाकःमिपिंत नं विभाजित यायेगु ज्या यानादिल । छि थः बेलायतय् च्वनाः नेपालय् च्वंपिं नेवाः संकिपाकःमिपिंत थःथः ल्वाकाच्वनेगु थ्व षडयन्त्रकारी ज्यायात नेवाः संकिपा ख्यःयात आघात यायेगु अपराध खः धकाः छाय् मधायेगु ?

न्ह्यसः ३) छिगु संरक्षकत्वय् न्हूगु संस्था गठन यानादीधुंकाः आः छिगु हे संरक्षकत्वय् गठन जुयाच्वंगु थुगु संघयात गुकथं न्ह्याकेगु अले थ्व संघय् छिगु भूमिका छु जुइगु खः स्पष्ट यानादीत इनाप याना ।

नायः
हृदयप्रसाद मिश्र
तिथि ः ११४४ दिल्लाथ्व १२ (श्रावण ३, २०८१)