बाल्टिमोरय् पलिस्था याइगु शंखधरया झ्वाता लःल्हात

थिमि(नेपालभाषा टाइम्स)÷राष्ट्रिय विभूति शंखधर साख्वाः प्रतिष्ठानं अमेरिकाया मेरिल्याण्ड सहरया बाल्टिमोरय् पलिस्था यायेत्यंगु नेपाल संवत्या प्रवर्तक शंखधर साख्वाःया प्रतिमूर्ति लःल्हाःगु दु । शनिवाः प्रतिष्ठान परिसरय् जूगु छगू ज्याझ्वःया दथुइ शंखधरया उगु प्रतिमूर्ति लःल्हाःगु खः ।

प्रतिष्ठानपाखें मध्यपुर थिमि नगरपालिकाया प्रमुख सुरेन्द्र श्रेष्ठं बाल्टिमोरस्थित नेपाः कम्युनिटी युएसए (एनसीयु)या संरक्षक बैकुण्ठमान श्रेष्ठयात शंखधरया मूर्ति लःल्हानादीगु खः । प्रतिष्ठानं नेपाल संवत्या प्रणेतालिसें राष्ट्रिय विभूति शंखधर साख्वाः व नेपाल संवत्या प्रचार प्रसार विदेशय् नं यायेगु उद्देश्यं शंखधरया मूर्ति लःल्हानागु जानकारी बिउगु दु । प्रतिष्ठानं शंखधरया मूर्ति नेवाः कम्युनिटी युएसएया इनापकथं लःल्हाःगु खः ।

प्रतिष्ठानया नायः ज्ञानराम श्रेष्ठया सभापतित्वय् जूगु ज्याझ्वलय् मध्यपुर थिमि नगरपालिकाया उपप्रमुख विजयकृष्ण श्रेष्ठ, निवर्तमान नगर प्रमुख मदनसुन्दर श्रेष्ठ, प्रतिष्ठानया पुलांपिं नायःपिं मदनकृष्ण श्रेष्ठ, श्यामकृष्ण मानन्धर, चन्दनकृष्ण श्रेष्ठ लगायतं भिंतुना न्वचुलिसें थःगु नुगःखँ तयादीगु खः ।

उगु इलय् एनसीयुया संरक्षक श्रेष्ठं प्रतिष्ठानया नायः श्रेष्ठयात सुभाय् पौ नं लःल्हानादीगु खः । बाल्टिमोरय् पलिस्था याइगु शंखधरया उगु प्रतिमूर्ति कलाकार धर्मराज शाक्यं दयेकादीगु खः । ल्वहंया उगु मूर्तियात कलाकार लक्ष्मीकृष्ण प्रजापतिं फाइबर ग्लासय् धाले यानादीगु खः ।

बाल्टिमोरय् शंखधरया झ्वाता पलिस्था यायेत एनसीयुं इनाप याःकथं छुुं दिं न्ह्यः प्रतिष्ठानया ज्यासना पुचःया मुँज्या च्वनाः मूर्ति लःल्हायेगु निर्णय याःगु खः ।
प्रतिष्ठानया न्वकु सुरेश प्रधान लसकुस यानादीगु ज्याझ्वलय् निवर्तमान नायः चन्दनकृष्ण श्रेष्ठं सुभाय् देछानादीगु खः ।

सम्बन्धित बुखँ

LEAVE YOUR COMMENTS