खुम्ह पत्रकारतय्त लहनाया सिरपाः

येँ – लहना वाःपौ खुदँ बुन्हिया लसताय् खुम्ह पत्रकारयात थीथी सिरपाः लःल्हाःगु दु । ज्याझ्वलय् लहना वाःपौयात ग्वाहालि याना वयाच्वंपिं न्हय्म्ह समाजसेवीपिंत नं हनेज्या याःगु खः ।

कान्तिपुर न्हिपौया हिमेशरत्न वज्राचार्ययात लहना धर्म–मोति पत्रकारिता सिरपाः, लक्ष्मण नेवाःयात लहना पंचबीर सिरपाः, भिजन संसार डटकमया श्याम स्मृतयात लहना सुर–सम्मान सिरपाः, गोरखापत्रया उपेश महर्जनयात लहना मोहनी सिरपाः, नेपाल मण्डल टेलिभिजनया अनुप शाक्ययात लहना–न्यु जेनिथ पत्रकारिता सिरपाः व नेवाः अनलाइनया सम्पादक सुजीव वज्राचार्ययात लहना केशव–कृष्णबदन मातृभाषा पत्रकारिता सिरपाः लःहाःगु खः ।

मूपाहाँ येँ महानगरपालिकाया मेयर विद्या सुन्दर शाक्यं वय्कःपिंत दोसल्लां न्ययेकाः हनापौ देछायादीगु खःसा पुरस्कारया दातापिंसं नगद सिरपाः लःल्हानादीगु खः । ज्याझ्वलय् समाजसेवीपिं कृष्णलाल महर्जन, च्याङबा लामा, राज्यलक्ष्मी वज्राचार्य, अन्जना ताम्राकार, मोतिलक्ष्मी शाक्य लहना विशेष सम्मानं हनेज्या याःगु खः ।

प्रदेश नं. ३ या सांसद राजेश शाक्य, जनकवि दुर्गालाल श्रेष्ठ, समाजसेवी लक्ष्मीदास मानन्धरपिंसं पाहाँ कथं झायादीगु ज्याझ्वलय् साँस्कृतिक ज्याझ्वः नं न्ह्यब्वःगु खः । ज्याझ्वलय् लहना वाःपौया प्रकाशक नृपेन्द्रलाल श्रेष्ठ, व्यवस्थापक सुरेन्द्रभक्त श्रेष्ठ, सम्पादक जुजुमान महर्जनपिंसं नं न्ववानादीगु खः ।