ने. सं. ११४४ कौलाथ्व चौथी -

बेलायतय् स्वसःम्हेसित गुथि भ्वय्

येँ(नेपालभाषा टाइम्स)- पासा पुचः गुथि साउथ इस्ट लन्दनया ग्वसालय् वार्षिक ज्याझ्वःकथं थ्व हे जुलाई महिनाया न्हापांगु शनिवाः छगू तःजिगु ‘गुथि भ्वय्’ जुल । बेलायतया लन्दनय् नेवाः परम्परा व संस्कृति पिब्वयेकथं मौलिक नेवाः परम्परा व शैलीं जूगु नेवाः भ्वजय् बेलायतय् च्वना वयाच्वंपिं स्वसलं मल्याक नेपाःमिया सहभागिता दुगु खः ।

साउथ इस्ट लन्दनया वुल्लीचय् जूगु नेवाः भ्वजय् झायादीपिं ज्याथःपिं व विशिष्ट पाहांपिंत नायः थाकुलि, थाकुलि नकिंकथं सम्मानित थासय् तयाः बेतालिं चिकाः भ्वय् नकूगु खः । भ्वय्या निंतिं सकतां घासाज्वलं साउथ इस्टया दुजःपिंसं थःथःगु छेँय् ज्वरे यानाः हःगु खः । उगु इलय् नेवाः परम्पराकथं थाकुलि, नायःपिंत सी बीगु तकं याःगु खः ।

मूपाहांकथं झायादीम्ह बेलायतया निंतिं नेपाःया राजदूत ज्ञानचन्द्र आचार्यं नेवाः भ्वय्या व्यवस्थापन खनाः थः येँय् हे च्वनाथें अनुभूति यानागु खँ कनादिसें भ्वय्या माध्यमं नेपाःया मौलिक संस्कार, संस्कृति, परम्परा बेलायत थेंज्याःगु देशय् नं गथे खः अथे पिब्वयेफुगुलिं लसता प्वंकादिसें ग्वसाः खलःयात सुभाय् देछानादिल ।

रोयल ग्रीनविच बरोया उपमेयर जीत रानाभाटं पीपीजी युकें बेलायतय् नेवाः संस्कृति ल्यंका तयेगु ज्याय् ज्वःमदुगु भूमिका म्हिता वयाच्वंगु धासें गुथिया ज्यायात कयाः च्वछायादिल । थुकथंया ज्याझ्वलं न्हू पुस्तायात मौलिक संस्कृति हस्तान्तरण याना वनेगु व इमित नं स्यनेकने यायेगु ज्याय् ग्वाहालि जुइगु विश्वास वय्कलं प्वंकादिल ।

पासा पुचः गुथि इस्ट लन्दनया नायः माधवलाल श्रेष्ठं भ्वजय् ब्वति कयादीपिं सकसितं सुभाय् देछासे बेलायत थेंज्याःगु थासय् थुकथंया परम्परागत नेवाः भ्वय् ज्वरे यायेगु उलि अःपुगु ज्या मखुसां गुथिइ आबद्ध सकलें दुजःपिंसं नेवाः परम्परा म्वाका तयेत छप्पँ जुयाः ग्वाहालि याःगुलिं हे थुकथंया ज्याझ्वः ग्वसाः ग्वयेत ताःलाःगु खः धयादिल ।

पासा पुचः गुथि युके लन्दनया नायः सुशील प्रजापतिं बेलायतय् खुक्वःखुसी थुकथंया नेवाः भ्वय्या ग्वसाः ग्वःगु खँ कनादिसें भ्वजय् ल्याय्म्हतय् सहभागिता अप्वयेकेगु उद्देश्यं इमित निःशुल्क यानाः स्वयंसेवकया रुपय् परिचालन यानागु जानकारी बियादिल ।

सत्यप्रसाद प्रजापतिया संयोजकत्वय् सोहन सुवाल भलिं नायः जुयादीगु गुथि भ्वय्या आवश्यक व्यवस्थापन व नसाज्वलं तयार यायेगु ज्याय् ईश्वर महर्जन, कृष्ण वैद्य, राजु श्रेष्ठ लगायतं ग्वाहालि यानादीगु खः ।

गुथि भ्वजय् विशेष पाहांकथं नांजाःम्ह म्येँ हालामि योगेश्वर अमात्य, मास्टर सेफ सन्तोष शाह, सहिमा श्रेष्ठ, ओजेश सिंह झायादीगु खः ।