न्हूगु फोहोर वायेगु थाय् सरकारं हे दयेका बीगु
येँ – स्वनिगःया फोहोर व्यवस्थापन यायेगु न्हूगु थाय्या रुपय् बञ्चरेडाँडायात हे छ्यलेगु कथं नेपाल सरकारं नं तयारी शुरु याःगु दु ।
शहरी विकास मन्त्रालयं बञ्चरेडाँडाय् दीर्घकालीन फोहोर व्यवस्थापन यायेगु निंतिं डिजायनया ज्या समेत न्ह्याकाच्वंगु खँ सीदुगु दु । फोहोर व्यवस्थापन यायेगु थाय् सुनां केन्द्र सरकार अथवा स्थानीय सरकार मध्ये सुनां दयेकेगु धइगु विवाद जुयाच्वंगु इलय् वंगु १७ गते च्वंगु मन्त्रिपरिषदया बैठकं शहरी विकास मन्त्रालयं दयेकेगु धकाः निर्णय याःगु खः ।
सरकारया थ्व निर्णयया नापनापं फोहोरया दीर्घकालीन समस्याया समाधान सुनां यायेगु धइगु विवाद नं क्वचाःगु दु । येँ महानगरपालिका लगायत स्वनिगःया झिंच्यागू नगरपालिकाया फोहोर थौंकन्हय् नुवाकोटया सिसडोलय् व्यवस्थापन याना वयाच्वंगु दु । मन्त्रालयया प्रवक्ताया कथं वइगु फागुन तक गज्याःगु ल्याण्डफिल दयेकेगु धइगु बारे नमूना तयार यानाः ज्या न्ह्याकेगु जुइ ।
स्वनिगलय् जक थौंकन्हय् न्हिं १ हजार मेट्रिक टन फोहोर उत्पादन जुयाच्वंगु दु । उकी मध्ये येँ मनपाय् जक ५०० मेट्रिक टन स्वयां अप्वः फोहोर उत्पादन जुयाच्वंगु दु । मन्त्रालयया कथं बञ्चरेडाँडाय् फोहोर व्यवस्थापन यायेत स्वदँया ई काइ । सिसडोलय् फोहोर जायाः चलः वने फइगु अवस्था जुयाच्वंगु दु ।
अन आः छुं ई जक फोहोर वांछ्वये फइगु जूगुलिं तत्काल अस्थायी फोहोर व्यवस्थापनया लागिं जकसां छुं यायेमाःगु अवस्था दु । कामपाया वातावरण विभागया प्रमुख हरि श्रेष्ठं धाःसा दीर्घकालीन फोहोर व्यवस्थापनया निंतिं हे ज्या न्ह्यायेधुंकूगुलिं आः अल्पकालीन फोहोर व्यवस्थापन केन्द्र दयेके म्वाःगु खँ कनादीगु दु ।
वय्कलं आःया निंतिं सिसडोलय् हे फोहोर व्यवस्थापन याये फइ धासें सिसडोलं निसें बञ्चरेडाँडा तक वनेगु लँ दयेकेगु ज्या न्ह्यानाच्वंगुलिं वइगु निलाया दुने अन हे फोहोर व्यवस्थापन याये फइगु खँ कनादीगु दु । सिसडोलय् निदँया निंतिं जक फोहोर व्यवस्थापन यायेगु धकाः धाःगु खःसां नं झिंस्वदँ तक अन फोहोर वायेगु ज्या यानाच्वंगु दु । थुकिं यानाः सिसडोलया स्थानीय जनतां आः फोहोर वाके मबीगु खँ समेत धायेगु याना हःगु दु ।
LEAVE YOUR COMMENTS