मेडिसिटीइ नं जलास्येँ प्रत्यारोपण

यल (नेपालभाषा टाइम्स)- यलया नख्खुइ च्वंगु नेपाल मेडिसिटी अस्पतालय् नं जलास्येँया प्रत्यारोपण जुया वयाच्वंगु दु । ‘मृगौला दिवस’ व मेडिसिटी असपतालय् जलास्येँ प्रत्यारोपण सुरु जूगु दछि दुगु लसताय् मेडिसिटीइ मंगलवाः जूगु छगू ज्याझ्वलय् अस्पतालय् आःतक २३ गू सफल जलास्र्ये प्रत्यारोपण जुइधुंकूगु जानकारी बिउगु खः ।
मेडिसिटीइ वंगु २०७९ माघं निसें जलास्येँया प्रत्यारोपण सुरु याःगु खः ।

थ्व दछिया दुने जलास्येँ प्रत्यारोपण याःपिं २३ म्ह मध्ये झिंन्हय्दँ निसें ६५ दँ तक दुपिं ल्वगित दुगु खँ धाःगु खः । थुपिं ल्वगिपिं मध्ये गुलिसितं मांम्हं, गुम्हेसित भाःतं, गुम्हेसितं कलातंसा गुम्हेसित जिचादाजुं, गुम्हेसितं ससःमामं जलास्येँ दान याःगु खः । थथे दान याःपिं मध्ये झिंखुम्ह मिसा व न्हय्म्ह मिजं दुगु खःसा जलास्येँ काःपिं झिंखुम्ह मिजं व न्हय्म्ह मिसा दुगु जानकारी नं बिउगु दु ।

मेडिसिटीइ जलास्येँ प्रत्यारोष्पण याःपिं अप्वः धयाथें विरामीतय् जलास्येँ स्यंगु कारण उच्च रक्तचाप व चिनिल्वय् हे जूगु खँ अस्पतालया नेफ्रोलोजी तथा मृगौला प्रत्यारोष्पण विकागया प्रमुख डा. प्रकाश पौडेलं धयादीगु दु ।

‘नीस्वम्ह मध्ये फुक्क धयाथें उच्च रक्तचाप व चिनि ल्वय्या कारणं हे जलास्येँ स्यंगुलिं अस्पताल वःगु खनेदु । मेगु कारण धयागु ग्लोमेरुलो नेफ्राइटिस, शरीरय् प्रोटिनया मात्रा म्हो जुयाः लिकेजव जुलकि जलास्येँ स्यनीे’. डा. पौडेलं धयादीगु दु ।

जलास्येँ प्रत्यारोपणया निंतिं वइपिं थौंकन्हय् विदेशय् वनाः ज्या याना वःपिं नं अप्वया वःगु खँ वय्कलं धयादीगु दु । वय्कःया कथं मेडिसिटीइ जलास्येँ प्रत्यारोपण याःपिं नीस्वम्ह मध्ये न्याम्ह विदेशय् ज्या याना वःपिं खः । उपिं कतार, दुबईपाखें उपचारया निंतिं वःपिं खः । तसकं तांन्वःथाय् च्वनाः ज्या यायेमाःगु व लःया कमी जुइगु कारणं खाडी देशय् च्वनावःपिंत जलास्येँया समस्या अप्वः खनेदुगु खँ नं डा. पौडेलं धयादीगु दु ।

जलास्येँ प्रत्यारोपणया निंतिं सरकारं न्यागू लाख तका तक उपचार खर्च बी । थीथी उपचार खर्च थप यायेबलय् न्हय्गू निसें च्यागू लाख तक तुइ । तर सरकारी अस्प्तालय् जलास्येँ प्रत्यारोपण यायेत ताःई पियाच्वनेमालीगु अवस्था दु । नेपाल मेडिसिटी अस्पतालय् प्रत्यारोपण यायेबलय् झिंन्यागू लाख तका तक तुइगु मृगौला ल्वय् विशेषज्ञ डा. ऋषि काफ्लें धयादीगु दु । ‘थन ल्याप्रोस्कोपी विधिपाखें उपचार जुइ, गुकिया कारणं जलास्येँ बिउम्ह व काःम्ह निम्हेसिनं यक्व स्याइमखु, अले याकनं नं छेँय् लिहौ वनेखनी’ डा. काफ्लें धयादीगु दु । वय्कःया कथं मेडिसिटीइ उपचार यायेबलय् जलास्येँ दान याःम्ह स्वन्हु निसें प्यन्हुया दुनेसा जलास्येँ काःम्ह खुन्हु निसें न्हय्न्हुया दुने डिस्चार्ज जुइ ।