मनपापाखें शिक्षाय् जक ७० करोड तकाया बजेट

येँ (नेपालभाषा टाइम्स)÷येँ मनपां शिक्षाया नितिं बजेटय् ७० करोड तका स्वयां अप्वः दां फ्याःगु याःगु दु । थ्व धइगु चालु आर्थिक दँया बजेट स्वयां स्वदुगं अप्वः खः ।

येँ मनपां वइगु आर्थिक दँय् सार्वजनिक शिक्षा सुधारया थीथी ज्याझ्वः नं घोषणा याःगु दु । फुक्कं विद्यालयया शौचालय स्तरोन्नति, फुक्कं मावि ९–१२ कक्षाय् वालय् छन्हु सीपमूलक शिक्षा बीगु, नमूना रुपय् विद्यालयय् विद्यार्थीया लकर दयेकेगु व आः न्ह्यानाच्वंगु ज्याझ्वःया नं बजेट अप्वयेकूगु खः ।

मनपाया विद्यार्थीयात खाजाय् बीगु ध्यबाय् थप १० तका बीगु जूगु दु । संघीय सरकारं न्हिं १५ तका बीगुली येँमनपां १० तका थपे यायेत्यंगु खः ।