येँ–सक्व आः गथे खः अथे हे पीच याइगु

येँ – यँ नं सक्व वनेगु सतक सरकारं मापदण्ड अःखः पीच याइगु जूगु दु । सर्वोच्च अदालतं स्थानीय जनतायात मुआब्जा बियाः जक सतक विस्तार यायेत आदेश बीवं आः उपत्यका सतक विस्तार आयोजनां आः गन गपाय्ब्यागु लँ दु अन वहे कथं पीच याकेत्यंगु खः ।
मुआब्जा विवादं यानाः ताः इलंनिसें सतक दयेकेगु ज्या ठप्प जुइवं छुं ई न्ह्यः च्वंगु मन्त्रिपरिषद् बैठकं सतकया ब्या गुलि दु उकी हे पीच याना छ्वयेत निर्देशन बिउगु खः ।

आः दुगु संरचना कथं सतक पीच यायेबलय् गनं तब्या व गनं चिब्या जुइगु खँ आयोजनां धाःगु दु । छेँ टहरा मदुगुु व स्थानीय वासिन्दाया विरोध मदुगु थासय् २२ मिटर चौडाइ दइसा सरकारी जग्गा दुगु थासय् नं २२ मिटर हे ब्या दइ । आयोजनाया कथं म्हो जक थासय् २२ मिटरया ब्या दइ । आपालं थासय् ब्या चिब्या जुइ ।

थौंकन्हय् सतकया थीथी थासय् पाइप लायेगु लगायत मेमेगु संरचना दयेकेगु ज्या नं जुयाच्वंगु दुसा गनं पीच यायेगु ज्या जुयाच्वंगु दु । बौद्धया हयात होटल, मूलपानी व जोरपाटीइ पीच यानाच्वंगु दुसा मेथाय् संरचना दयेकेगु ज्या जुयाच्वंगु दु ।
सतक पीच यायेगु निंतिं मेलम्ची खानेपानी आयोजनाया पाइप लाइन विस्तार, टेलिफोन व बिजुलीया थां, धः लगायतया संरचना इलय् क्वमचाःगुलिं सतक पीच यायेगु ज्याय् पंगः वयाच्वंगु खँ आयोजनां धाःगु दु । थीथी निकायतय्त तःक्वः पौ च्वयेधुंकाः नं उमिसं ज्या लिबाकाच्वंगुलिं नं सतक पीच यायेगु ज्याय् पंगः वयाच्वंगु खँ धाःगु दु ।