सफू ब्वज्याय् सफू पितब्वज्या

येँ – नेपालभाषा एकेदेमिया ग्वसालय् जूगु सफू ब्वज्याया झ्वलय् न्याम्ह च्वमिपिनिगु सफू पितब्वज्या जुल । स्वन्हुयंकं जूगु सफू ब्वज्याया निन्हुया दिं कुन्हु न्यागू सफू पितब्वज्या जूगु खः ।

वंगु शुक्रवाःनिसें शुरु जूगु सफू ब्वज्याया निन्हुया दिंकुन्हु साहित्यकारलिसें समालोचक नर्मदेश्वर प्रधानया बाखं सफू ‘जिं नं बाखं च्वया’, कवयित्री प्रतिसरा सायमिया प्रबन्ध मुना ‘लिफः’, विजयरत्न असंबरेया चिबाखं ‘श्री–३’, रितादेवी प्रधानया बाखं सफू ‘खनाखँ’ व नरेश अमात्यया चिबाखं सफू ‘आखे’ पित ब्वज्या जूगु खः ।

ज्याझ्वलय् मूपाहांकथं झायादीम्ह जनकवि दुर्गालाल श्रेष्ठ, पाहांकथं झायादीपिं नेवाः न्ह्यलुवा मल्ल के सुन्दर, बाखं च्वमि यज्ञरत्न धाख्वा, साहित्यकार डा. पुष्पराज राजकर्णिकार व समालोक प्रा. प्रेमशान्ति तुलाधरं सफू पितब्वज्या यानादीगु खः । नागार्जुन पब्लिकेशनया नायः डा. सर्वोत्तम श्रेष्ठया सभापतित्वय् जूगु ज्याझ्वलय् च्वमिपिं प्रतिसरा साय्मि, नरेश अमात्य व विजयरत्न असंबरें थःथःगु नुगःखँ तयादीगु खः ।