पशुपतिया जलहरी लुँयागु कि लीयागु ?

येँ (नेपालभाषा टाइम्स)- पशुपतिइ तयातःगु जलहरी लुँयागु खः लाकि लीयागु खः छानबिन यायेगु लागिं नेकपा (एमाले) या सांसदतय्सं माग याःगु दु ।

सरकारं थुकिया छानबिन यानाः तथ्यसत्य खँ सार्वजनिक मयाःतले संसद न्ह्याके बी मखु धकाः म्हिगः एमाले सांसदतय्सं सभामुखया वेल घेराउ यायेवं बैठक हे अवरुद्ध जूगु खः ।

घेराउया कारणं बन्द यायेमाःगु संसद बैठक लिपा २० मिनेटया लागिं धकाः बन्द याःगु खःसा उगु बैठक ७ घन्टा लिपा नं च्वने मफुत । सभामुखं सर्वदलीय बैठक तःसां समस्या धाःसा मज्यं ।

सत्तारुढ दल नेकपा (माओवादी केन्द्र) या सांसद लेखनाथ दाहालं एमाले अध्यक्ष केपी ओलीं पशुपतिइ लुँयागु जलहरी तयागु धकाः लीयागु जलहरी तयाः भ्रष्टाचार याःगु धकाः द्वपं बियादीगु खः । संसदया बैठकय् वय्कलं अथे न्ववायेवं प्रतिपक्षी एमालेया सांसदतय्सं तुरुन्त हे उकी आपत्ति प्रकट यासें सरकारं जलहरीया परीक्षण यानाः सत्यतथ्य छु खः उकिया रिपोर्ट सार्वजनिक या धकाः विरोध प्वंकूगु खः ।

नापं थुकिया बारे सरकारं पशुपतिया जलहरीया परीक्षण यानाः रिपोर्ट महःतले बैठक न्ह्याके बी मखु धकाः घेराउ नं याःगु खः । एमालें सत्तापक्षीय सांसदं न्ववाःगु थ्व खँ संसदया रेकर्डं हे हटे यायेमाः धकाः नं माग याःगु दु । अथे हे थ्व न्ववाःम्ह सांसदं संसदय् वयाः माफी फ्वने माःगु नं एमालें याःगु दु ।

तर माओवादीं धाःसां सांसदं माफी फ्वनेगु मखु बरु माल धाःसा छानबिन समिति गठन यानाः न्ह्याः वनेगु जुइ धकाः प्रस्ताव न्ह्यःने तःगु खँ सीदुगु दु । एमालें थ्व द्वपंयात नं नक्कली भुटानी शरणार्थी प्रकरणय् थें हे एमालेयात फँसे यायेत न्ह्यःने हयेत्यंगु मेगु प्रकरण खः धकाः थुइकूगु खँ सीदुगु दु ।

बयान सुनियोजित जूगु ओलीया द्वपं
नेकपा (एमाले) या अध्यक्ष केपी शर्मा ओलीं नक्कली शरणार्थी प्रकरणय् थःलिसे सतीपिं मनूतय्गु नां सुनियोजित रुपं हे पोले याकाः सार्वजनिक यानाच्वंगु द्वपं बियादीगु दु । म्हिगः पार्टी कार्यालयय् स्थानीय तहया मेयर, उपमेयर व अध्यक्ष उपाध्यक्षतय् लागिं जूगु प्रशिक्षण ज्याझ्वलय् न्ववासें अध्यक्ष ओलीं उगु खँ धयादीगु दु ।

अभियुक्ततय्के कयाच्वंगु बयान हे रोके यानाः हानं न्हूकथं बयान कयाः थः सतीपिं मनूतय् नां सुनियोजित रुपं पित कयाच्वंगु धासें वय्कलं न्ह्यसः तयादिल, ‘सुयाकें प्रहरीं बयान काल धायेवं व बयान नापनापं हे मिडियाय् नं वनेगु यानाच्वंगु दु, थ्व गय् यानाः वन ?’

एमालेयात फँसे यायेगु लागिं सुनियोजित रुपं हे मुद्दा तयार यायेगु ज्या जुयाच्वंगु द्वपं नं वय्कलं बियादीगु दु ।