आइतवाः ‘नाद रंग’ बाँसुरी लाइभ

येँ (नेपालभाषा टाइम्स)- अन्तर्राष्ट्रियस्तरय् परिचित प्रसिद्ध भारतीय बासुरीवादक आश्विन श्रीनिवासनंं बाँसुरी वादन न्ह्यब्वइगु जूगु दु ।

जयश्री संगीत समाजया ग्वसालय् वइगु आइतवाः (फागुन २८) गते जुइगु ‘नाद रंग – कलर्स अफ साउन्ड’ कन्सर्ट बाँसुरी लाइभ’ ज्याझ्वलय् श्रीनिवासनयात प्रख्यात तबलावादक ओजस अढियां तबलाय् साथ बियादी ।

निदँ दसांनिसें भारतीय शास्त्रीय सङ्गीत सयेकादीम्ह आश्विन संगीतकार परिवारय् हे जन्म जूम्ह खः । थः मांपाखें सितार सयेकेगु ज्या न्ह्याकादीसां न्हय्दँ दुबलय् बाँसुरीइ मन क्वसाःम्ह वय्कः मुम्बईया दकलय् ब्यस्तम्ह बाँसुरीवादक खः ।

दाफा व शास्त्रीय संगीतया थीथी बाजं फ्यूजन यानाः न्ह्यब्वयाः न्ह्याइगु थुगु ज्याझ्वलं झीगु दाफा संगीतया प्रवद्र्धनय् नं ग्वाहालि याइगु जयश्री संगीत समाजया नायः लक्ष्मी डंगोलं कनादिल । येँ महानगरपालिकाया ग्वाहालिइ न्ह्याइगु थुगु ज्याझ्वःपाखें मुंगु ध्यबां संगीतया विद्यार्थीपिनिगु निंतिं माःकथं छात्रवृत्ति बीगु नं तातुना दु । ज्याझ्वः येँ महानगरपालिकाका उप–प्रमुख सुनीता डंगोलया मूपाहांसुइ राष्ट्रिय नाचघर, जमलय् सनिल ५ बजे न्ह्याइ ।