वडा सदस्य मदुसां मपाः !
मंसिर १४ या उपचुनावय् सदस्य मदु
येँ – संसद व थीथी स्थानीय तहलय् खाली जुयाच्वंगु पद जायेकेगु लागिं निर्वाचन आयोगं थ्वहे वइगु मंसिर १४ गते उपचुनाव यायेगु धकाः मिति घोषणा याःगु दु । तर थ्व चुनाव सांसद लगायत स्थानीय तहया मेयर–उपमेयर व वडा अध्यक्ष तहया लागिं जक याइगु खँ धाःगु दु । वडा सदस्यया लागिं धाःसा चुनाव मजुइगु खँ निर्वाचन आयोगं स्पष्ट याःगु दु ।
देय्या थीथी स्थानीय निकायय् थौंकन्हय् वडा अध्यक्ष जक मखु वडा सदस्यत नं खाली जुयाच्वंगु दु । गुलिखे थासय् पदाधिकारी सिनाः पद खाली जुयाच्वंगु दुसा गुलिं थासय् न्हापा उम्मेदवार हे मदयाः नं खाली जुयाच्वंगु दु । निर्वाचन आयोगया अनुमान कथं देय्न्यंकं मिसा व दलित मिसाया करिब ६०० गू पद खाली जुयाच्वंगु दु ।
तर उगु पदया लागिं धाःसा चुनाव मयायेगु खँ आयोगं धाःगु दु । निर्वाचन सम्बन्धी कानून स्पष्ट मजुयाः नं चुनाव याये मछिंगु खँ धाःगु दु । वडा अध्यक्ष धइगु कार्यकारी पद जूगुलिं थुकिया चुनाव याये हे माःगु तर वडा सदस्य चाहिँ मदुसां नं वडाया ज्या रोके मजुइगु कारणं उकिया चुनाव मयाःसां जिउ धइगु निष्कर्षय् आयोग थ्यंगु खँ धाःगु दु ।
आयोगया कथं मंसिर १४ गते देय्या ३७ गू जिल्लाय् न्यनाच्वंगु ५० गू पदया लागिं उपचुनाव यायेत्यंगु खः ।चुनावया मिति घोषणा जूसां विप्लव पार्टीपाखें थ्व चुनाव याके बीगु खः वा मखु धइगु खँ धाःसा अनिश्चित जूगुलिं मतदानया ज्याय् सुरक्षा चुनौती दुगु खँ धाःगु दु । उपचुनाव न्ह्यःने वःगुलिं हे सरकारं विप्लवलिसे वार्ता यायेत स्वयाच्वंगु खँ नं धाःगु दु ।
वामदेव गनं ?
नेकपाया वरिष्ठ नेता वामदेव गौतमयात आः वइगु उपचुनावय् कास्कीपाखें उम्मेदवारी बीत पार्टी अध्यक्ष लिसें प्रधानमन्त्री केपी ओलीं संकेत बियादीगु खँ पिहां वःगु दु । मदुम्ह मन्त्री रवीन्द्र अधिकारीया चुनाव क्षेत्रं वामदेवयात थनेगु ग्वसाः प्रम ओलीं यानादीगु सूत्रया दावी दु । अधिकारया कलातं चुनाव ल्वाये मखु धाःगुलिं अन वामदेवया नां वःगु खँ सूत्रं धाःगु दु । ओलीपाखें थज्याःगु ‘सुझाव’ वःगुलिं थौंकन्हय् गौतम हानं ओली क्याम्पय् वंगु चर्चा दु ।
LEAVE YOUR COMMENTS