३ नं. प्रदेशया लागिं परियोजना बैंक

येँ – ३ नम्बर प्रदेशया मुख्यमन्त्री डोरमणि पौडेलं प्रदेश सरकारं शुरु यायेत्यंगु परियोजना बैंकयात याकनं हे कार्यान्वयनया चरणय् यंकेगु खँ कनादीगु दु । आइतवाः मुख्यमन्त्री लिसें मन्त्रिपरिषद्या ज्याकुथिइ जूगु सहलह ज्याझ्वलय् न्ववासें वय्कलं न्हापांगु चरणय् प्रदेश सरकारं थःगु न्हय्गुलिं मन्त्रालयं याइगु ज्याया योजनायात परियोजना बैंकय् तयाः जक प्रक्रिया न्ह्यःने न्ह्याकेगु खँ कनादिल ।

विकासया योजना थौंकन्हय् हरेकसिया खल्ती खल्तीं वयेगु यानाच्वंगु खँ कँसें मुख्यमन्त्री पौडेलं परियोजना बैंकय् समावेश जूगु योजनायात प्राथमिकताय् तयेगु खँ कनादिल । ‘परियोजना बैंक दयेधुंकाः खल्तीं वइगु योजनाया अन्त्य जुइ’ मख्यमन्त्री पौडेलं धयादी ।

व्यक्तिया खल्तीं वइगु योजनायात निरुत्साहित यानाः संस्थागत योजना कार्यान्वयनय् परियोजना बैंकया भूमिका महत्वपूर्ण जुइगु वय्कःया धापू दु । चालु आर्थिक दँया योजना न्ह्यायेधुंकूगुलिं वइगु आर्थिक दँय् परियोजना बैंक कार्यान्वयन यानाः यंकेगु सरकारया योजना दु ।
चालु आर्थिक दँया दुने हे परियोजना बैंक दयेकाः वइगु आर्थिक वर्षंनिसें लागू यायेगु तयारी जूगु राष्ट्रिय नीति तथा योजना आयोगया उपाध्यक्ष डा. खिमलाल देवकोटां जानकारी बियादीगु दु ।

बैंकया स्थापना लिपा व्यक्तिगत स्वार्थ स्वयां नं सामाजिक आवश्यकताया आधारय् ज्याझ्वः छनोट व कार्यान्वयन चरणय् यंकेगु योजना सरकारं न्ह्यःने हःगु दु ।मुख्यमन्त्री पौडेलं थौंकन्हय् प्रदेश सरकारं हेटौंडायात राजधानी माने यानाः भौतिक पूर्वाधार निर्माणया ज्याखँ न्ह्यानाच्वंगु जुयाः यदि हेटौंडां राजधानी सारे यात धाःसा दछि तक विकासया ज्या याये मफइगु खँ धायेगु यानाच्वंगु दु ।

 

सम्बन्धित बुखँ

LEAVE YOUR COMMENTS