स्वनिगलय् गाडी भाडा कुहां वइगु खँय् अन्योल

येँ (नेपालभाषा टाइम्स) – आयल निगमं म्हिगः चान्हय् निसें चिकंया भाः क्वकायेवं आः सार्वजनिक यातायातया भाडा नं क्वकायेगु तयारी याःगु दु । तर स्वनिगलय् गाडी भाडा कुहां वइगु कि मवइ धयागु अन्योल दु ।

प्रदेश दुने चले जुइगु सवारी साधनया भाडा दर सम्बन्धित प्रदेश सरकारं हे क्वःछीगु व समायोजन यायेगु व्यवस्था दु । थ्व ल्याखं स्वनिगलय् चले जुइगु सवारी साधनया भाडा दर बागमति प्रदेश सरकारं समायोजन यायेमाःगु खः । तर बागमति प्रदेश सरकारया श्रम, रोजगार तथा यातायात मन्त्रालयया प्रदेश कार्यक्रम संयोजक तथा सुचना अधिकारी सागर विक्रम बस्नेतं भाः समायोजन यायेगु बारे मन्त्रालयय् सहलह हे मजूनिगु खँ धयादीगु दु । वय्‌कलं चिकंया भाः स्थिर जुइधुंकाः जक थ्व बारे निर्णय जुइफुगु खँ धयादीगु दु ।

आयल निगमं म्हीग पेट्रोलय् जक नीतका दां क्वकायेवं यातायात व्यवसायीतय्सं स्वचालित प्रणाली कथं भाडा समायोजन यायेत धाःगु खः ।यातायात व्यवस्था विभागया निर्देशक मणिराम भुसालया कथं चिकंया भावय् जुइगु हेरफेरया आधारय् स्वचालित रुपं भाडा दर समायोजन जुइगु प्रणाली दुगुलिं व हे कथं थनिंनिसें हे भाडा दर समायोजन जुइगु खँ धयादीगु दु । स्वचालित प्रणाली कथं चिकंया भाः ५ प्रतिशत कुहां वनकि भाडा समायोजन जुइमाः, आः ५ प्रतिशत स्वयां अप्वः भाः कुहां वंगुलिं भाडा नं समायोजन जुइत्यंगु खः ।

मध्यपूर्वय् द्वन्द्व तच्वयाः इन्धन आपूर्ति समस्या वयेवं चिकंया भाः थहां वंगु खः । चिकंया भाःथहां वनेवं वंगु वैशाख १६ गते गाडी भाडा नं थकाःगु खः । निर्देशक भुसालं उबलय् चिकंया भाः थहां वंगु कथं ९.८ प्रतिशत तक गाडी भाडा थकायेमाःगु खःसां ५ प्रतिशत जक थकाःगुलिं आः भाः कुहां वइबलय् यक्व कुहां मवयेफुगु खँ धयादीगु दु ।