रवि लामिछानेया पार्टीया लाेगाे अमेरिकी स्वतन्त्र पार्टीया लाेगाेया हूबहु नक्कल

येँ- चले जुयाच्वंगु सञ्चार माध्यम त्वःताः आकाझाकां राजनीतिक पार्टी चायेकाः राजनीतिइ प्रदेश जुयादीम्ह सञ्चारकर्मी रवि लामिछानें चायेकादीगु ‘राष्ट्रिय स्वतन्त्र पार्टी’ या लोगो वहे नांया छगू अमेरिकी राजनीतिक पार्टीया लोगोलिसे हुबहू मिले जूगु किपा पिहां वःगु दु । सामाजिक सञ्जालय् म्हिगःनिसें निगू पार्टीया लोगो छथासं तयाः थ्व संयोग जक खः लाकि पूर्व नियोजित हे खः धकाः न्ह्यसः तयेगु ज्या समेत याना हःगु दु ।

अमेरिकाय् न्हापा हे दुगु ‘अमेरिकन फ्रिडम पार्टी’ या नां समेत ‘राष्ट्रिय स्वतन्त्र पार्टी’ लिसे गनं गनं मिले जूगु खनेदुसा निगुलिं पार्टीया लोगो ‘गं (घन्टी)’ नं मिले जुयाच्वंगु दु ।

अथे हे निगुलिं पार्टीया लोगोया पिने नगु (तारा) चिं तयातःगु दु । अमेरिकन पार्टीया चिन्हय् १३ गः तारा दुसा नेपाःया स्वतन्त्र पार्टीया लोगोय् ७ प्रदेशया प्रतीक कथं ७ गः हे तारा तयातःगु दु । निगू पार्टीया थ्व समानतायात कयाः थन थीथी कथंया न्ह्यसः नं पिहां वयाच्वंगु दु ।

रवि लामिछाने छगू इलय् अमेरिका वनाः वहे देशया नागरिकता समेत कयाः च्वनाच्वनेधुंकूम्ह खः । वय्कः अमेरिकां लिहां वयाः नं अनया नागरिकता त्याग मयासे हे नेपालय् पत्रकारिता यानाच्वंगु जुयाः तःधंगु विवाद जूगु खःसा विवाद पिहां वयेवं तिनि वय्कलं अमेरिकाया नागरिकता त्याग यानादीगु खः । तर अमेरिकाया नागरिकता त्याग याःसां नं वय्कःया उच्चस्तरया आर्थिक हैसियतयात कयाः धाःसा नेपालय् न्ह्यसः पिहां वयेगु यानाच्वंगु दु । छम्ह सामान्य सञ्चारकर्मी जुयाः नं वय्कःयाके उलिमछि सम्पत्ति गनं वल धइगु खँय् नेपालय् सर्वसाधारण मनूतय्सं न्ह्यसः तयेगु यानाच्वंगु दु ।

सम्बन्धित बुखँ

LEAVE YOUR COMMENTS