द्यः जुइत निवदेन बीगु म्यादफुत
येँ – येँयाः बलय् कुमारीया नापं रथयात्रा यायेमाःपिं गणेश व भैरव थ्वहे मोहनिबलय् हिलीगु जूगु दु । थः मस्तय्त गणेश व भैरव याये इच्छुकपिं अभिभावकपिंत नां छ्वयाहजि धकाः आह्वान यासें बियातःगु म्याद म्हिगः क्वचाःगु दु । तर म्याद म्हिगः क्वचाःसां थौं सनिलया ४ बजे थुकिया बारे बैठक च्वनीगु जूगुलिं थौं ४ बजे न्ह्यः तक वःगु निवेदनयात नं माने यायेगु खँ धाःगु दु ।
जीवित द्यःपिं गणेश व भैरव ल्ययेगु ज्या थुगुसी न्हापांखुसी सार्वजनिक आह्वान यासें खुल्लाकथं यायेत्यंगु खः । गणेश व भैरव जुइगु अधिकारप्राप्त बहाःत येँय् १६ गू दुसां फुक्क बहाःयात इलय् जानकारी मवः धासें गणेश–भैरव ल्यज्या पारदर्शी मजुल धकाः गुनासो वःगु जुयाः थुगुसी थ्व ल्यज्या यायेगु जिम्मा हे शाक्य महाविहार संघयात बिउगु खः ।
हिलावंगु ईया नापनापं देय्या फुक्क ख्यलय् हिउपाः वयाच्वं थें धार्मिक ख्यलय् नं फयांफक्व हिउपाः हयेगु ताःतयाः थुगुसी थुकथंया पलाःन्ह्याकूगु खः । संघपाखें गणेश व भैरव जुइत योग्यपिं झिंगुलिं बहाःयात पौ हे छ्वयाः इच्छुकपिंसं निवेदन बीत आह्वान याःगु खः ।
थौं सनिलया ४ बजे तक वःगु निवेदनयात नं मान्यताबीगु खँ थुगु ज्याय् संलग्न संघया दुजः संघरत्न शाक्यं ‘नेपालभाषा टाइम्स’ यात कनादिल । भाजु शाक्यं कनादीकथं म्हिगः तक ७–८ गू निवेदन वःगु दु । संघं थ्व स्वयां नं अप्वः निवेदन दुहां वइगु आशा याःगु खः । आशा यानाति निवेदन दुहां मवःगु बारे वय्कलं धयादी, ‘जीवित द्यःपिं ल्ययेगु ज्या सामान्य मखु ।
थुकिया लागिं संघ कडा मापदण्ड दयेकागु दु । उकिं यानाः नं निवेदन मवःगु जुइफु ।’गणेश व भैरव जुइपिनिलागिं संघं दयेकूगु मापदण्डय् विशुद्ध शाक्यकुलपुत्र हे जुइमाःगु, छुं नं घाःखू मदुम्ह, दीर्घ ल्वय् मदुम्ह, लक्षणयुक्त व देशया अवस्थालिसे मेल जूम्ह, निडर व फुर्ति दुम्ह, २ निसें ५ दँ दुम्ह जुइमाः ।
थौं ४ बजे च्वनीगु बैठकं दुहां वःगु फुक्क निवेदनयात कयाः सहलह याइ । वयां लिपा उपयुक्त मचाया नां सिफारिस यानाः सरोकार समितियात लःल्हाइ ।
फुलपाती कुन्हु गणेश व भैरव हिली
पुलांपिं गणेश व भैरवपिंत आसनं क्वकयाःथ्वहे फुलपाती कुन्हु न्हूपिं गणेश व भैरव प्रतिस्था याइगु ग्वसाः दु । कुमारी मोहनिया दशमि कुन्हु हिलीगु खःसां गणेश व भैरव धाःसा फुलपाती कुन्हु हिलीगु खः । बहालवाला गणेश व भैरवं न्हूपिंत थःपिनि तिसा लःल्हानाबिज्यासें हिलेगु ज्या याइगु खः । थुपालय् थ्व ज्या नं सकल भक्तजनपिनि न्ह्यःने हे याये माली धकाः सुझाव वयाच्वंगु खँ शाक्यं कनादिल ।
LEAVE YOUR COMMENTS