भौतिक कक्षा बन्दया निर्णय

येँ (-देय्न्यंकं हानं तच्वया वंगु कोरोना महामारी नियन्त्रणया लागिं सार्वजनिक थासय् जुइगु भीडभाड म्हो याये माःगु व स्कुल व कलेजया भौतिक कक्षा नं आःयात स्थगित यायेमाःगु निर्णय कोरोना नियन्त्रण सम्बन्धी सरकारी निकाय सीसीएमसीं याःगु दु । म्हिगः च्वंगु सीसीएमसीया बैठकं याःगु थ्व निर्णय आः सरकारयात सिफारिस याइगु खँ धाःगु दु ।

सीसीएमसीं थनिंनिसें हे विद्यालयय् जुयाच्वंगु भौतिक कक्षा माघ १५ गते तक बन्द यायेमाःगु निर्णय याःगु खः । जाँच सञ्चालन जुयाच्वंगु स्कुलय् धाःसा थ्व निर्णय लागू मजुइगु तर जाँच सिधयेवं हे बिदा बीमाःगु खँ धाःगु दु । स्वनिगःया आपालं स्कुलय् थौंकन्हय् चिकुलाया बिदा बीगु नं तयारी जुयाच्वंगु दु ।

अथे हे भ्वय्, भेला, कार्यक्रम, सांस्कृतिक पर्वया नामय् मनू मुनेगु ज्यायात नं तत्काल दिकेमाःगु निर्णय सीसीएमसीं याःगु दु । सरकारपाखें आः न्हापा थें हे २५ म्ह स्वयां अप्वः मनू मुने मदइगु नियम कार्यान्वयन यायेमाःगु निर्णय नं याःगु दु । थौंकन्हय् भ्वय्, मेला, जात्रा, पर्वया नामय् मनूत मुनेगु ज्या जुयाच्वंगु व उकिं यानाः संक्रमण अप्वया वनाच्वंगु धासें थ्व ज्यायात तत्कालन नियन्त्रण यायेमाःगु खँ पिहां वःगु खः ।

संक्रमण अप्वया वनाच्वंगु हे कारणं यानाः आः हानं लकडाउन नं याइगु खः लाकि धइगु चिउताः नं थन ब्वलंगु दु । स्वनिगःया स्वंगुलिं जिल्लाया सीडीओतय्गु मंकाः बैठक च्वनाः अप्वया वनाच्वंगु संक्रमण नियन्त्रण यायेत छु याये माली धकाः सहलह जूगु खँ सीदुगु दु । थुकिया बारे प्रधानमन्त्री निवास वालुवाटारय् नं सहलह जूगु खः ।

तर अन लकडाउन हे तये माली धइगु खँय् धाःसा छुं खँ मजूगु जानकारी सूत्रं धाःगु दु । अथे खःसां सामाजिक दूरी कायम यायेगु लागिं ‘स्मार्ट लकडाउन’ याये माली धइगु खँय् सहलह जूगु खँ सूत्रं धाःगु दु । ‘स्मार्ट लकडाउन’ य् बहनी निश्चित ई लिपा बजाः बन्द यायेगु, होटल रेष्टुरेन्टय् खोप कयातःगु कार्ड क्यनाः जक दुहां वने दइगु, अन नं यक्व भीडभाड याये मदइगु नियम लागू जुइगु खँ धाःगु दु ।

सम्बन्धित बुखँ

LEAVE YOUR COMMENTS