नेपालय् वःपिं हलिउड स्टारत

नेपाः पर्यटकीय सम्भावनाय् न्ह्यःने लानाच्वंगु देश खः । भौगोलिक विविधता अले सांस्कृतिक व धार्मिक परम्पराय् तःमिगु देश नेपालय् आपालं पर्यटक वया च्वं । उलिजक मखसे थन थीथी देशया फिल्मया शुटिंग नं जुया च्वं, अले शुटिंगय् ब्वति कायेत थीथी देशया स्टारत नेपाः वया च्वं ।

उकुन्हु हे तिनि हलिउडया तसकं नांजाःम्ह स्टार मोर्गन फ्रिम्यान थन “इन सर्च अफ गड” नांयागु छगू टेलिसिरियलया शुटिंगया निंतिं नेपाः वःगु खः । नेपाः देय्या धार्मिक व सांस्कृतिक परम्परायात न्ह्यब्वयेगु कुतः कथं नेपालय् शुटिंग यायेत वःगु उगु सिरिजया शुटिङ्ग झ्वलय् येँदेय्या पुलांम्ह कुमारी मतिना शाक्यलिसें मोर्गन फ्रिम्यानं खँल्हाबल्हा याःगु लु नं खिचे याःगु खः ।

गुलिखे हलिउड स्टारत थःगु फिल्मया शुटिङ्गया झ्वलय् नेपाल वःगु दुसा गुलिखे स्टारत धार्मिक सद्भावना भ्रमणय् नं वःपिं दु । अथेहे गुलिखे मेमेगु हे उद्देश्यं नेपाः वःगु दु । थौंसिबें नीन्यादँति न्ह्यः हलिउडया नांजाःम्ह एक्शन स्टार स्टिभन सिगल नेपाःया बौद्ध धर्मबारे सीके–सयेकेत नेपाः वःगु खः ।

अथेहे तुं रिचर्ड गेरे नांयाम्ह हलिउड स्टार नं धार्मिक सद्भावनादूतया रुपय् नेपाः वःगु दु । विशेष यानाः तिब्वतियन गुम्बाय् वनेत वइम्ह रिचर्ड गेरेया नेपाः भ्रमण व तिब्बति गुम्बा प्रतिया सद्भावनायात कयाः आपाःसिनं कुंखिउगु खः । सन् १९७७ या जःखः नेपाः वःम्ह रिचार्ड गेरे तःक्वः हे नेपाः वःगु दु ।

थौंसिबें प्यदँति न्ह्यः थन तःभुखाय् ब्वयेधुंकाः राहतया ज्याय् ग्वाहालि यायेत चिनिया मूलया हलिउड स्टार ज्याकी चान नेपाः वःगु खः । ज्याकी चान थन युनिसेफया सद्भावनादूतया रुपय् नेपाः वःगु खःसा थन भुखाचय् लानाः सास्ती नयाच्वंपिंत राहत इनेगु ज्या नं याःगु खः । नेपाःया धुँ संरक्षणया ज्याय् ग्वाहालि यायेत हलिउडया नांजाःम्ह स्टार लियोनार्डो डि क्याप्रियो नेपाः वःगु खः ।

“टाइटनिक” नांया साप हे लोकंह्वाःगु हलिउड फिल्मया हिरो लियोनार्डो नेपाः वयाः थन बर्दिया राष्ट्रिय निकुञ्जय् नं वंगु खःसा धुँ संरक्षण ज्याया निंतिं स्वंगू करोड डलर दां नं ग्वाहालि कथं बियाथकूगु खः । युनिसेफया सद्भावनादूतया रुपय् नेपाः वःम्ह मेम्ह हलिउड स्टार धइम्ह सेलिना गोमेज खः ।

सन् २०१४ य् नेपाः वःम्ह सेलिना गोमेजं नेपाःया तराई लागा बाँके व बर्दिया वनाः अनया त्वनेगु लःया व्यवस्थाय् सुधार व थारु जनजातिया मस्तय्गु शिक्षाया विकास आयोजनायात तिबः बीगु ज्या याःगु खः । युनिसेफया सद्भावनादूत जुयावःम्ह मेम्ह छम्ह हलिउड स्टार मिशेल योह नं खः ।

ज्याकी चान थें हे तुं चीनं हलिउड थ्यंम्ह मिशेल योह नं हलिउडया छम्ह स्टार खःसा ज्याकी चान थें हे तुं २०७२ या तःभुखाचं कःपिं पीडितपिंत राहत चूलाकेगु आज्जु ज्वनाः नेपाः वःगु खः । सद्भावनादूतया रुपय् नेपाः वःम्ह मेम्ह हलिउड स्टार डेमी मुरे नं खः । क्यामरुन डियाज, लुसी लु व ड्रयु बेरीमोरया मेनरोल दुगु “चार्लीज एन्जल्स”य् निगेटिभ रोल म्हितूम्ह डेमी मुरे हलिउडया तसकं हे नांजाःम्ह हिरोइन खःसा थन माइति नेपालया उद्धार अभियानयात ग्वाहालि यायेत वःगु खः ।

थन वःगु इलय् डेमीं लुम्बिनी व भैरहवा वनाः अन थीथी थासं उद्धार यानाहःपिं मिस्त नं नापलाःगु खः । माइति नेपालया ज्याकथी वनाः अन नं अथे उद्धार यानाहःपिं मिस्त नापलाःगु खः । थथे सद्भावनादूत जुयाः वःपिं बाहेक थन शुटिङ्ग यायेत वःपिं हलिउड स्टारत नं आपालं दु । तर थन सु वल ? गुबलय् वल धइगु रेकर्ड धाःसा गनं मदु ।

नीन्यादँ स्वीदँति न्ह्यः “गोल्डेन चाइल्ड” नांयागु हलिउड फिल्म शुटिंग यायेत हलिउडया नांजाःम्ह स्टार एडी मर्फि नेपाः वःगु दु । गुलिखे शुटिङ्ग नेपालय् याःगु थ्व फिल्मया गुलिखे लु धाःसा लिपा मेथाय् सेट दयेकाः शुटिङ्ग यानातःगु खँ झीसं उगु फिल्म स्वयेबलय् खंकेफइ । अथे हे तुं नेपालय् तःभुखाय् ब्वःगु छुं ई लिपा हलिउडया छगू फिल्म “डा. स्ट्रेन्ज”या शुटिङ्गय्् ब्वति कायेत बेनेडिक्ट क्लम्बरब्याच नेपाः वःगु खःसा उगु फिल्मया शुटिङ्ग येँ यल ख्वपया थीथी थासय् जूगु खः ।

थ्व फिल्मय् येँ देय्या पुलांगु बजाः असंया नं छगू लु दुथ्याना च्वंगु दु । शुटिङ्ग हे यायेत नेपाः वःपिं मेपिं स्टारत मध्ये “चार्लीज एन्जल्स”या हे छम्ह हिरोइन क्यामरुन डियाज नं खः । सन् २००७ य् नेपाः वःम्ह क्यामरुन डियाज थन गुगुं फिल्मया शुटिङ्गया निंति मखसे एमटिभिया छगू रियालिटी शो “ट्रिपिन” या शुटिंग यायेत खः ।

क्यामरुन नापनापं इभा मेण्डेस नांयाम्ह हलिउड हिरोइन नं वःगु खः । उगु रियालिटी शोया शुटिङ्ग चितवनया जंगलय् जूगु खः । अथे हे तुं हलिउडया तसकं लोकंह्वाःगु साइन्स फिक्शन सिरिज “द म्याट्रिक्स”व “वाकिंग ईन द क्लाउड्स”या हिरो कियानु रिभ्स नं नेपालय् छगू फिल्मया शुटिङ्गय् वःगु दु ।

तथागत बुद्धया जीवनीइ दयेकूगु “लिटिल बुद्ध”फिल्मय् कियानु रिभ्सं बुद्ध जुयाः म्हितूगु खः । हलिउडया नांजाःम्ह फिल्म डाइरेक्टर बर्नार्डो ब्रटोलुचीं दयेकूगु उगु फिल्मया शुटिङ्ग थन नेपालय् जूगु इलय् फिल्मया नांयात कयाः विवाद नं जूगु खः । तथागत बुद्धयात “लिटिल” धकाः धाये दइमखु धका सः थ्वःगु खः, तर लिपा वनाः फिल्मया नां “लिटिल बुद्ध” हे तयां त्वःतल ।

“ब्रोकब्याक माउण्टेन” थेंज्याःगु तसकं चर्चित फिल्मया हिरो ज्याक गिलेनहल सन् २०१४पाखे संसारय् दकलय् तजाःगु च्वापुगुँ सगरमाथाया बाखनय् दयेकूगु “एभरेस्ट” नांया फिल्मया शुटिङ्गय् ब्वति कायेत वःगु खःसा थ्व “एभरेस्ट” फिल्मय् जेसन क्लार्क, जोश ब्रोलिन व जोन हक्स थेंज्याःपिं हलिउड स्टारत नं नेपाः वःगु खः ।

हलिउडया नांजाःम्ह सिंगर ब्रायन आडम्स थन छगू म्युजिकल कन्सर्ट यायेत सन् २०११ य् वःगु खःसा ओर्लाण्डो ब्लुम नांया स्टार नं युनिसेफया सद्भावनादूत जुयाः हे नेपाः वःगु खः । अथे हे तुं युएनएफपिएया सद्भावना जुयाः गेरी हेलिवेल नेपाः वःगु दुसा गेरी मय्जु व नेपाःया तत्कालिन प्रधानमन्त्री माधवकुमार नेपाल घय्पुनाच्वंगु फोटो उगु इलय् तसकं हे बय्बय् जूगु खः ।

थथे गुलिखे हलिउड स्टारत थन शुटिंगया निंतिं वःगु दुसा गुलिखे स्टारत सद्भावनादूतया रुपय् नं वःगु दु । तर छम्ह निम्ह हलिउड स्टार धाःसा नेपाः चाःहिलेगु उद्देश्य ज्वनाः हे वःपिं नं दु । विशुद्ध टुरिस्ट जुयाः हे जक वःपिं स्टार मध्ये हलिउडया नांजाःम्ह पप स्टार रिकी मार्टिन खःसा मेम्ह टिभि स्टार लरेन कोनार्ड खः ।

सन् २०१३ य् नेपाः वःम्ह लरेन कोनार्डया बारे उलि खँ सीमदुसां रिकी मार्टिन धाःसा सन् १९९९ व सन् २००० य् निक्वः वल धइगु खनेदु । रिकी मार्टिन उगु इलय् थँबहीया नांजाःगु काठमाण्डौ गेस्ट हाउसय् बाय् च्वंगु धइगु न्यनेदु । अथे हे तुं “रिभर्सल अफ फर्चुन”या निंतिं अस्कर अवार्ड त्याकूम्ह हिरो जेरेमी आइरन्स नं थः जहान ज्वनाः नेपाः चाःहिउ वःम्ह हलिउड हिरो खः ।