कलिउड स्टारतय् रेट

अनमोल के.सी.या रेट न्यय्गू लखतक थ्यन धकाः छक्वः तसकं हे बय्बय् जुल । वयागु डेब्यु फिल्म “होस्टेल” तसकं हे लोकंह्वाःगु फिल्म खःसा वयां लिपा वयागु “गाजलु”, “जेरी” नं हिट, सुपरहिट हे जुल । ल्याय्म्ह पुस्ताया दथुइ लोकंह्वाःम्ह अनमोल लोकंह्वाःसां वयात बांलाःम्ह कलाकार धकाः गबलें मधाः ।

थःत एक्टिंगय् फ्यासुम्ह हिरो धाइगुलिं वं “कृ”नांयागु फिल्म म्हितेत भचा गाक्क हे तयारी यात । वयागु तयारीया लिच्वः ला ताःलात । वं थ्व फिल्मय् याःगु ज्याया तारीफ नं जुल, तर बनेज्या धाःसा न्हापाया स्वंगू फिल्मया हकय् “कृ” थ्यने मफुत । अय्सां वयागु क्रेज धाःसा पाः जूगु खनेमदु । वयात झरना थापा नांयाम्ह हिरोइनं थःगु फिल्म म्हितेत न्यय्गू लख तका तक बीत तयार जूगु खँ पिहां वल ।

तर लिपा स्वीगू लख दां बियाः “ए मेरो हजुर ३”या निंतिं साइन यात । छखे हिरोतय् रेट स्वीगू लख तका थ्यंगु खनेदतसा मेखे साम्राज्ञी राज्यलक्ष्मी शाह नांयाम्ह हिरोइनं “कायरा” फिल्म म्हितेत च्यागू लख दां काल धइगु खँ पिहां वल । थुकथं स्वयेबलय् कलिउडय् फिल्म म्हितीपिं स्टारतय् रेट थहां वल धइगु खनेदु । तर न्हापा अथे मखु ।

निरुता सिंह, मेलिना मानन्धर, जल शाह, पुजा चन्द, निशा अधिकारी थेंज्याःपिं हिरोइनतय्गु फिल्म म्हितेगु रेट छगू लख सिबें थहां वनेमफुतसा निखिल उप्रेती, बिराज भट्ट, राजबल्लभ कोइराला थेंज्याःपिं हिरोतय्गु रेट स्वंगूनिसें न्यागू लखसिबें अप्वः थहां वनेमफुत । कलिउड धकाः धयातःगु नेपाःया फिल्म ख्यलय् थथे लोकंह्वाःपिं कलाकारतय्त स्टारया रूपय् काःगु ताः मदुनि ।

छगू इलय् नेपालय् फिल्म म्हितीपिं स्टारतय्सं विशेष यानाः न त ध्यबाया डिमाण्ड याये खन, न त ल्ययाः ल्ययाः फिल्म म्हितेगु ह्वःताः हे चूलाके खन । विशेष यानाः राजेश हमालं थथे याइगु खः । वं गुबलें ध्यबाया डिमाण्ड नं मयाः, अले रोल ल्ययेगु कुतः नं मयाः । राजेश हमालयात न्हूम्ह हिरो धकाः धाइगु इलय् कलिउडय् नांजाःपिं हिरोत धइपिं शिव श्रेष्ठ व भुवन के.सी. खः ।

उबलय् उमिगु रेट धइगु न्यय्द्वःतका खः । राजेश हमालं थःगु डेब्यु फिल्म “युगदेखि युगसम्म” म्हितूबलय् नीन्याद्वःतका कायेखनसा अनं लिपा वयागु भाः थहां वनाः स्वंगू प्यंगू फिल्मया दुने हे छगू लख तका थ्यंकल । थुकथं छगू लख तका रेट थ्यंकूम्ह हिरो राजेश हमाल हे न्हापांम्ह खः ।

राजेश हमालं छगू लख तका रेट थ्यंकूगु इलय् रमेश उप्रेती नांयाम्ह छम्ह हिरों “माया गर्छु म” म्हितूगु इलय् छगूत्या लख रेट थ्यंकाः तहल्का मचे यात । तर राजेश हमालया न्ह्यःने व दनाच्वने मफुत । राजेश हमालया रेट थहां वनाः स्वंगू लख तक थ्यन । अले थ्वहे राजेश हमालया स्टाण्डर्ड रेट जुयाबिल । थुलि दां दतकि वं रोल, कोस्टार स्वयेगु मयात ।

न्ह्यःने वक्व फिल्म म्हिता यंकल । कलिउडया फिल्मयात भिंके मबिउम्ह हे राजेश हमाल धकाः धायेगु यानाहल । छाय्धाःसां राजेश हमालं चाहे जूगु जूसा ल्ययाः ल्ययाः फिल्म म्हितेफुगु खः । थथे ल्ययाः बांलाःगु जक फिल्म म्हितूगु जूसा राजेश हमालयात कयाः फिल्म दयेके चाहे जूपिंसं बांलाक फिल्म दयेकेगु कुतः याइगु जुइ धकाः धाइपिं यक्व दु ।

राजेश हमालयात स्वस्वं उसिचाये धुंकूपिं स्वकुमिया निंतिं छपाः न्हूगु ख्वाः जुयाः आर्यन सिग्देल वल । राजेश हमालं मयाःगु ज्या वं यायेत स्वल । यानिकि वं रोल ल्ययेगु कुतः यात । कोस्टार व टिम बांलाःगु ल्ययेगु कुतः यात । अले थःगु रेट नं न्यागू लख तक थ्यंकल । वयात न्यागू लख बीत प्रोड्युसर डाइरेक्टरतय्सं छतिं हे लिफः मस्व, तर वं धाःथें फिल्म दयेकेत उपिं तयार मजुल ।

उमिसं थः यःथे फिल्म दयेकेगु व थः यःम्ह कलाकारयात आर्यनलिसे म्हितकेगु स्वल । अज्याःगु गुलिं फिल्मया अफर आर्यन सिग्देलं स्वीकार मयातसा गुलिखे फिल्ममेकरतय्सं वयागु खँयात घमण्डिपहः धकाः धाल । अले बुलुहुं वयागु लुखाखरुइ वइपिं फिल्ममेकरत म्हो जुयावन ।

आर्यन सिग्देल लिपा कलिउडय् फिल्म स्टारया ख्वालय् तःधंगु हे हिलासू वल । न्हापा खसब्रम्हु ख्वाः वःपिं स्टारतय्सं थाय् कयाच्वंगुलि आः वया नेवाः, गुरुङ्ग, राई ख्वाःवःपिं मंगोलियन ख्वालं थाय् कयाहल । अज्याःपिं स्टारतय्गु रेट नं थहां वयाच्वंगु दु । “मेरो एउटा साथी छ ” फिल्मय् आर्यन सिग्देल हिरो जुयाः म्हितूगु इलय् बःचाधंगु रोलय् जक खनेदयेकः वःम्ह दयाहाङ्ग राई लिपा वनाः तसकं लोकंह्वाःम्ह हिरोया रूपय् न्ह्यःने वल ।

वयागु रेट थौंकन्हय् झिंन्यागू लख तक थ्यंगु दुु । “लुट” हिट जुइधुंकाः थहां वःम्ह दयाहाङ्गया लिपांगु फिल्म उलि लोकंह्वाये फयाच्वंगु मदुसां थगुने “कान्छि” व थुगुसी “भैरे”या बनेज्या भतिचा ताःलाःगु दु । थथे झीगू लखनिसें झिंन्यागू लख तका रेट थ्यंकूपिं मध्ये “पशुपतिप्रसाद” म्हिताः चर्चाय् वःम्ह खगेन्द्र लामिछाने छम्ह नं खः ।

तर वयागु न्हूगु फिल्म “धनपति”या बनेज्या नं उलि ताःलायेफुगु खनेमदु ।“लुट” धुंकाः थहां वःपिं मध्ये सौगात मल्ल व कर्मा नं खः । सौगात मल्लया रेट थौंकन्हय् झिगू झिंन्यागू लख तक थ्यंगु दुसा कर्माया रेट धाःसा न्यागूनिसें च्यागूलख दुने लानाच्वंगु दु । सौगातयात मेनरोलय् अफर वयाच्वंगु दु धाःसा कर्मा साइड रोलय् तक्यनाच्वंगु दु ।

अनमोल के.सी. धुंकाः हिरोत मध्ये थौंकन्हय् दकलय् चर्चाय् वयाच्वंपिं धइगु पल शाह व प्रदिप खड्का खः । “प्रेमगीत” फिल्मं थहांवःम्ह प्रदिप खड्का नांयाम्ह हिरोया रेट नीगू लख तका धकाः बय्बय् जुयाच्वंगु दु । अथेहे पल शाहयात “नाईं नभन्नु ल ४” पाखें हिरोया रूपय् पहिचान बिउगु खःसा “म यस्तो गीत गाउँछु” फिल्म धुंकाः कलिउडय् हिरोया रूपय् स्ट्याब्लिस जूगु खः ।

खय्त ला वयागु “जोनी जेण्टलमायन” फ्लप जुल तर अय्सां वयागु रेट धाःसा थहां वनाः झिंन्यागू लख तक थ्यंगु दु । हिरोइनतय्गु चर्चा यायेबलय् थौंकन्हय् दकलय् अप्वः रेट थ्यंम्ह साम्राज्ञी राज्यलक्ष्मी शाह हे खः । तर वयात नं उलि ग्यंम्ह कलाकारया रूपय् कयातःगु मदु । उकीसनं वं आः तकया हे दकलय् अप्वः दां काःगु धकाः धाःगु “कायरा” फ्लप जूबलय् वयागु डिमाण्ड म्हो जुइ धइगु हुइनाभुइना दु ।

हिरोइनतय्गु रेट थकायेगुलिइ रेखा थापाया तःधंगु ल्हाः दु । छगू फिल्मयात छम्ह हिरो नं थें हे याकःचां क्वबिइफुम्ह हिरोइन रेखा थापां थःगु रेट न्यागू लख थ्यंकूगु इलय् मेमेपिं नां चले जूपिं हिरोइनतय्गु रेट छगू लख निसें स्वंगू लख तक जक थ्यनाच्वंगु खः ।

थथे छगू निसें स्वंगू लख दुनेया रेट दुपिं हिरोइनय् केकी अधिकारी, निशा अधिकारी, निता ढुंगानापिं खःसा थौंकन्हय् आयुष्मान देशराज जोशीलिसेया इहिपा जुइगु खँ व “कथा काठमाडौं” फिल्मय् हट बेडसिन बिउगु कारणं चर्चाय् वयाच्वंम्ह हिरोइन प्रियंका कार्की नं न्यागू लख तक थ्यंम्ह हिरोइन खः । निगू लख तका रेटय् लाःम्ह हिरोइन वर्षा राउत खः । वयागु “जात्रा”व “छक्का पञ्जा” लोकंह्वाःगु फिल्म खः ।