च्याक्वःगु वृहत् राष्ट्रिय खेलकुद शुरु

येँ – च्याक्वःगु वृहत् राष्ट्रिय खेलकुद बुधवाःनिसें शुरु जूगु दु । नेपालगञ्जय् वैशाख ५ गते औपचारिक उद्घाटन जुइत्यंगु जूसां न्यागू कासा बुधवाः निसे शुरु जूगु खः । राष्ट्रिय खेलकुद परिषदं ताःहाकः म्हितेमाःगु कासात उद्घाटन न्ह्यः हे शुरु यायेमाःगु खँ धाःगुु दु । उद्घाटन न्ह्यः बुधवाःनिसें टेबलटेनिस, कुस्ती, लनटेनिस, स्क्वास व मिजंतय्गु हकी कासा सुरु जूगु खः ।

अथेहे उद्घाटन न्ह्यः बक्सिङ, कबड्डी, जुडो, बास्केटबल, बुद्धिचाल, फुल कन्ट्याक्ट कराँते, साइक्लिङ, फेन्सिङ व गल्फ नं जुइ । च्याक्वःगु वृहत् राष्ट्रिय खेलकुदय् ३५ गू कासाय् धेंधेंबल्लाः जुइत्यंगु दु । राष्ट्रिय खेलकुदया इतिहासय् हे न्हापाखुसी थुगुसी प्याराग्लाइडिङ धेंधेंबल्लाः नं जुइत्यंगु दु । अथेहे एनआरएनया समूह नं न्हापांखुसी ब्वति कायेत्यंगु दु ।

च्याक्वगःगु वृहत् राष्ट्रिय खेलकुदय् न्हय्गू प्रदेश, स्वंगु विभागीय टिम व एनआरएनया यानाः २८२५ म्ह मिजं कासामि व २३८६ म्ह मिसा कासामि यानाः मुक्कं ५२११ म्ह कासामितय्सं ब्वति कयाच्वंगु दु । थ्व धेंधेंबल्लाखय् ३७२ गू स्वर्ण , ३७२ गू रजत व ५६३ गू कास्य पदकया निंतिं धेंधेंबल्लाः जुइ । राष्ट्रिय खेलकुदय् दुथ्याःगु ३५ गू कासा मध्येय् १८ गू कासा बाँकेय् जुइसा मेगु कासा बर्दिया, दाङ, रुपन्देही व कपिलवस्तुइ जुइ । समापन समारोह वैशाख ११ गते जुइ ।

 

सम्बन्धित बुखँ

LEAVE YOUR COMMENTS