बेलंया पेनाल्टि असफल, तर निगू गोलय् ग्वाहालि

एजेन्सी÷ गारेथ बेलं पेनाल्टिइ गोल याये मफुसां निगू गोलया निंतिं असिस्ट यायेवं वेल्सं टर्कियात २–० गोलं बुकेत ताःलाःगु दु । युरो कपया समूह ए या बुधवाः चान्हय् जूगु कासाया ४२ औं मिनेटय् बेलया ग्वाहालिं रामसें न्हापांगु गोल याःगु खः । तर निगूगु हाफय् ६१ औं मिनेटय् वेल्सयात पेनाल्टिया ह्वःताः चूलात ।

गारेथ बेलयात विपक्षी डिफेन्डरं बक्स लाइनय् फल तयेवं पेनाल्टि वःगु खः । थ्व पेनाल्टि थ्वायेत बेल हे न्ह्यःने वल, तर बेलं बलयात पोस्ट च्वय् थ्वानाबिल ।

पेनाल्टि मिसया कारणं निराश जूम्ह बेलं कासाया नियमित ई क्वचाया नं इन्जुरी ईया अन्तिम मिनेट ट्याक्टिकली कासा न्ह्यब्वसें कोनोर रोबर्टसयात गोलया ह्वःताः चूलाकाबिल । अन्तिम इलय् वःगु कर्नर बलयात न्ह्यःनें हे पास कासें बेलं पोस्ट लाइनया सिथसिथं बल ब्वाकाः रोबर्टस्यात पास मिले यानाबिउगु खः ।

थ्व विजय लिपा वेल्सया समूह ए य् ४ अंक जूगु दु । थ्वयां न्ह्यः स्वीट्जरल्यान्ड लिसे जूगु कासा १–१ गोलया बराबरीइ क्वचाःगु खः । टर्कि धाःसा थ्वयां न्ह्यःया कासाय् नं इटली पाखें ३–० गोलं पराजित जूगुलिं थ्यंमथ्यं धेंधेंबल्लाखं पिने लायेधुंकूगु दु ।

सम्बन्धित बुखँ

LEAVE YOUR COMMENTS