हिदान यायेत अक्षय कोष दयेकीगु

येँ – नेपाल रेडक्रस सोसाइटी महाबौद्ध उपशाखाया झिंप्यक्वःगु अधिवेशन क्वचाःगु दु । अधिवेशनय् महाबौद्ध उपशाखां थःगु हे स्रोतपाखें निरन्तर हिदान ज्याझ्वः याना वनेगु निंतिं ‘हिदान निरन्तर संचालनार्थ अक्षय कोष’ नामं न्यागू लाख तकाया कोष दयेकेगु घोषणा याःगु नं याःगु खः ।

थज्याःगु कोष नेपालय् हे न्हापांगुखुसी दयेके त्यंगु खँ नं महाबौद्ध उपशाखाया सभापति योगेश कुमार खड्गी कनादिल । अधिवेशनय् वःपिं सकसितं लसकुस यासें सभापति खड्गी थुगु कोषय् ग्वाहालि यायेत सकलें संघसंस्था, व्यक्तिपिंत आह्वान नं यानादीगु दु । ज्याझ्वय् मूपाहाँ कथं झायादीम्ह सांसद व पुलांम्ह रक्षामन्त्री भिमसेनदास प्रधानं अक्षयकोषया निंतिं नीन्याद्वः तका दां बीगु घोषणा नं यानादीगु खः ।

थ्व ध्यबा वइगु स्वांया पुन्हि कुन्हु उपशाखाया ग्वसालय् असनय् जुइगु हिदान ज्याझ्वलय् लःल्हाइगु जूगु दु । अधिवेशनय् महाबौद्ध उपशाखायात झिंन्यादँ तक निरन्तर नेतृत्व बिया वयाच्वनादीम्ह निर्वतमान अध्यक्ष कमल नकर्मीयात मूपाहाँ श्रेष्ठं दोसल्लां न्ययेकाः सम्मान नं यानादीगु खः ।

अथेहे विशिष्ट पाहाँ रेडक्रसा सोसाइटी येँ जिल्लाया सभापति मथुराराम श्रेष्ठं उपशाखापाखें ग्वसाः ग्वइगु हिदान ज्याझ्वःया निंतिं ग्वाहालि याना वयाच्वनादीपिं नरेन्द्रबहादुर श्रेष्ठ, नानीमैया शाही, लक्ष्मी महर्जन, जेष्ठ नागरिक समूहया कमलाछिया हरिबहादुर महर्जन, जुजुभाई श्रेष्ठ, रत्नकाजी ताम्राकार, हिराबहादुर खड्गी, माणिकरत्न कंसाकार, उदयरत्न कंसाकार, धु्रवनारायण मानन्धर, प्रदीप कुमार जोन्छे, गजेन्द्र श्रेष्ठ, उमेश सिं खड्गी, नवराज उप्रेती, विशाल चन्द्र उपाध्याय, नेपाल ऊल हाउस, लुनिभाः निःशुल्क स्वास्थ्य केन्द्र व कम्फोर्ट बचत तथा ऋण सहकारी संस्थायात हनेज्या यानादीगु खः ।

सम्बन्धित बुखँ

LEAVE YOUR COMMENTS