सरकारी संस्थान स्थानीययात जिम्मा बीत माग

येँ- केन्द्र सरकारया मातहतय् लानाच्वंगु सडक विभाग, नेपाल टेलिकम, नेपाल खानेपानी संस्थान व नेपाल विद्युत प्राधिकरण थेंज्याःगु सरकारी संस्था व ज्याकूयात येँ महानगरपालिका मातहतय् हयेत माग याःगु दु ।

येँ महानगरपालिकाया उपप्रमुख हरिप्रभा खड्गीं वंगु वालय् थन जूगु छगू सहलहया इलय् इपिं सरकारी निकाय येँ मनपाया मातहतय् हयेत माग यानादीगु खः । उपप्रमुख खड्गीं अज्याःगु निकाय येँ महानगर दुने हे लानाच्वंगु धासें इमिसं थवंथवय् समन्वय यानाः ज्या मयाइगुलिं समस्या वयाच्वंगु नं धयादिल ।

‘थुपिं निकायतय्सं थवंथवय् समन्वय यानाः ज्या यानाच्वंगु मदु, गुकिं यानाः महानगरं दयेकूगु संरचना थुमिसं स्यंकेगु ज्या जक यानाच्वन’ उपप्रमुख खड्गीं धयादिल, ‘महानगरं दयेकूगु संरचना मेपिंसं स्यंकीगु अले उकिया द्वपं दक्वं महानगरयात बीगु मिले मजू । थुकिया जिम्मा सुनां कायेगु । स्यंकीबलय् मेपिंसं अले द्वपं धाःसा थःपिंसं फयाच्वनेमाः । उकिं थुपिं निकाय येँ मनपाया मातहतय् वल धाःसा समस्या दइमखु ।’

विकास–निर्माणया ज्या यायेबलय् समन्वय यायेमाः धासें समन्वय मजुयाच्वंगुलिं हे स्वनिगलय् समस्या खने दयाच्वंगु वय्कःया धापू दु ।