येँ मनपापाखें विद्यालय अनुगमनयात तीव्रता

येँ – येँ महानगरपालिकां न्हूगु शैक्षिक सत्र शुरु जुइवं निजी विद्यालय अनुगमन नं न्ह्याकूगु दु । लिपांगु इलय् निजी विद्यालयं विद्यार्थी अनुकूल शुल्क कायेगु यानाच्वंगु धइगु खँ पिहां वयाच्वंगु इलय् येँ मनपां उकथं निजी विद्यालयया अनुमगनया ज्या न्ह्याकूगु खः ।

येँ मनपा शिक्षा विभाग प्रमुख प्रल्हाद अर्यालं बियादीगु जानकारीकथं न्हूगु शैक्षिकसत्र शुरु जुइवं न्हूगु भर्नाया निंतिं वइपिं विद्यार्थीपाखें निजी विद्यालयं अप्वः शुल्क कायेगु यानाच्वंगु धइगु खँ पिहां वयाच्वंगुलिं अनुगमनयात तीब्रता बिउगु खः ।
बैशाख लछितक भर्ना कायेगु ई जूगुलिं येँ मनपां नं थ्व लछितक हे नियमित रुपं विद्यालय अनुगमन याइगु जूगु दु ।

निजी विद्यालयं काइगु शुल्क विद्यालयया भौतिक संरचनाय् केन्द्रीत जुइगु जूगुलिं अनुगमनया झ्वलय् अनुचित रुपं अप्वः शुल्क कायेगु ज्या जुयाच्वंगु लुत धाःसा न्हापां सम्झे बुझे यायेगु व अथे यानाः नं माने मजुल धाःसा लिपा करावाही तकं यायेगु वय्कलं धयादिल ।

थौंकन्हय् येँ महानगरपालिका दुने जक सछिगू स्वयां अप्वः सामुदायिक व करिब न्हय्सलं मल्याक निजी विद्यालय संचालन जुया वयाच्वंगु दुसा थ्व निगुलिं विद्यालयया यानाः छगू लाख ख्वीन्याद्वः स्वयां अप्वः विद्यार्थी अध्ययन यानाचवंगु दु ।
विद्यालय व्यवस्थापन स्थानीय तह अन्तर्गत वयेवं येँ महानगरपालिकां उकथं अनुगमन न्ह्याकूगु खः ।

येँ मनपां वंगु असोजनिसें विद्यालय मर्ज यायेगु व न्हूगु विद्यालय संचालनया निंतिं अनुमति बीगु सम्बन्धय् विद्यालय निरीक्षक व स्रोत व्यक्तिं अनुगमन यायेगु याना वयाच्वंगु दु । थ्व झ्वलय् बैशाखनिसें न्हूगु भर्ना काइगु ई जूगुलिं थुकियात कयाः विशेष रुपं अनुगमन याना वयाच्वंगु खः ।

विभागया कथं चालु आर्थिक दँय् झिंनिगू न्हूगु विद्यालयं संचालनया निंतिं अनुमति बिउगु दुसा संचालनय् दुगु विद्यालय मध्ये कक्षा थपया निंतिं सछिगू निवेदन दुहां वःगु दु ।