ने. सं. ११४६ बछलागा चौथी -

उत्तर कोरियां ताःहाकःगु दुरीया मिसाइल परीक्षण यात

एजेन्सी- उत्तर कोरियां ताःहाकःगु दुरीया ‘क्रुज’ मिसाइल परीक्षण याःगु दु । उत्तर कोरियाया सरकारी सञ्चार माध्यम केसीएनं बिउगु समाचारकथं उत्तर कोरियां शनिवाः व आइतवाः यानाः निगः न्हूगु कथंया मिसाइल परीक्षण याःगु दु । सञ्चार माध्यम केसीएनया कथं थ्व मिसाइल रणनीतिक ल्याखं महत्वपूर्ण जूगु व मिसाइलं झिंन्यासः किलोमिटरया दुरी तक प्रहार यायेफइगु धाःगु दु । केसीएनं मिसाइलं जापानया यक्व हे थाय्यात निशाना दयकेफइगु नं धाःगु दु ।

उत्तर कोरियां वंगु जनवरीइ जो बाइडेनं अमेरिकाया राष्ट्रपतिया निंतिं शपथ कयाच्वंगु इलय् नं मिसाइल परीक्षण याःगु खः । थीथी इलय् मिसाइल परीक्षण यानाच्वंगुलिं अन्तर्राष्ट्रिय समुदायं उत्तर कोरियायात प्रतिबन्ध तयावयाच्वंगु दु । जापानया राजधानी टोकियोय् अमेरिका, दक्षिण कोरिया व जापानया दथुइ उत्तर कोरियायात कयाः वार्ता जुयाच्वंगु इलय् थ्व परीक्षण जूगु खः ।