तालिबानं बेलायत व भारतलिसे वार्ता यात

एजेन्सी- तालिबानं बेलायत व भारतलिसे वार्ता याःगु दु । बेलायतं तालिबान लिसे थः नागरिक व विदेशी सेनायात ग्वाहालि याःपिं मनूतय्गु उद्धारया निंतिं वार्ता याःगु खः । बेलायतया प्रधानमन्त्री कार्यालयया प्रवक्तां प्रधानमन्त्रीया विशेष प्रतिनिधि व तालिबानया दथुइ दोहाय् वार्ता जुयाच्वंगु धाःगु दु ।

बेलायतं अफगानिस्तानं १७ द्वः मनूतय्गु उद्धार यायेधुंकूगु दुसा अझ नं अफगानिस्तानय् बेलायतया नागरिकत थानाच्वंगु दनि ।

अथे हे दोहाय् कतारया निंतिं भारतया राजदूत दीपक मित्तल व तालिबानया दथुइ वार्ता जूगु दु । वार्ताय् अफगानिस्तानय् दुपिं भारतीयतय् सुरक्षाया विषयायात कयाः जूगु खः । भारतीय पक्षं अफगानिस्तानया भूमि भारतविरुद्ध प्रयोग मजुइकेत नं इनाप याःगु दु ।