ने. सं. ११४४ कौलाथ्व चौथी -

निजी विमानं आदित्यनाथया जनकपुर यात्रा

येँ – प्रदेश नं. २ या राजधानी जनकपुरय् थौं जुइगु विवाह पञ्चमि ज्याझ्वलय् सहभागी जुइत जःलाखःला देय् भारतया उत्तर प्रदेश प्रान्तया मुख्यमन्त्री योगी आदित्यनाथ थःगु हे निजी विमानपाखें वइगु जूगु दु । वय्कः थौं बुधवाः सुथय् १० बजे निजी विमानं जनकपुर थ्यंकादीगु ग्वसाः दु ।

वय्कःयात जनकपुरय् २ नम्बर प्रदेशया सरकारपाखें तःजिक लसकुस यायेत्यंगु दु । जनकपुरय् थौं विवाह पञ्चमि तःजिक न्यायेकेत्यंगु दु ।
विवाह पञ्चमि ज्याझ्वलय् वयेत्यंम्ह उत्तर प्रदेशया मुख्यमन्त्री आदित्यनाथया थ्व जनकपुर भ्रमण विवादय् लानाच्वंगु खःसां आः धाःसा वय्कःयात तःजिक लसकुस यायेगु निर्णय जूगु दु ।

अथे खःसां वय्कःया थ्व भ्रमणया लागिं सरकारं कडा सुरक्षा व्यवस्था यायेत्यंगु दु । वय्कःया थ्व भ्रमणया लागिं सरकारं २५०० नेपाल प्रहरी, ७०० सशस्त्र प्रहरी व ३०० सैनिक समेत परिचालन यायेत्यंगु दु । न्हापा वय्कःयात २ नम्बर प्रदेश सरकारं ब्वनापौ छ्वःगु धाःसां विवाद पिहां वयेवं सरकारं ब्वनापौ मछ्वयागु खँ स्पष्ट याःगु दु ।

नगरया थाय्थासय् सिसी टिभी जडान यानातःगु दुसा भ्रमणया इलय् निगः ड्रोन क्यामेरां नं निगरानी यानाच्वंगु दइ । वय्कःयात जनकपुरया ‘मधेस भवन’ य् मिथिला संस्कृति कथं तःजिक लसकुस यानाः वय्कः लिसें वःपिं साधु सन्ततय्त भोजन याकीगु ग्वसाः दु ।

मुख्यमन्त्री आदित्यनाथ तःधंगु पुचः सहित वयेत्यंगु खः । वय्कः व वय्कःया पुचःयात जनकपुरय् ५७ प्रकारया मिथिला नसात्वँसा भोजन याकीगु ग्वसाः दु । वयां लिपा तिनि वय्कः सीता–राम स्वयम्बर ज्याझ्वलय् सहभागी जुयादी ।