ने. सं. ११४४ कौलाथ्व पारू - नःलास्वनेगु

चीनपाखें म्हो महत्व, वइ ला सी ?

येँ – प्रधानमन्त्री केपी ओलीया जारी चीन भ्रमणय् चीनं वय्कः लिसें नेपाःयात म्हो जक महत्व बिउगु विश्लेषण याना हःगु दु । नेपाः दुहां वनीगु रेलमार्ग दयेका बीगु बचं चीनं बिउसां नं नेपाः प्रति याःगु व्यवहार धाःसा उच्च महत्वया मजूगु टिप्पणी कुटनीतिक ख्यलं याना हःगु दु ।

थःगु चीन भ्रमणया इलय् प्रम ओलीं चिनियाँ राष्ट्रपति सी जिनपिनयात नेपाः भ्रमण याकेगु लागिं तःधंगु कुतः यानादीगु खँ सूत्रं धाःगु दु । वय्कलं राष्ट्रपति सीयात नेपाः भ्रमणय् वयेत तःक्वः हे इनाप यानादीगु खःसां राष्ट्रपति सीं ‘उपयुक्त इलय् वये’ धकाः लिसः बियादीगु खः । वय्कःया थ्व लिसः कुटनीतिक भासं नेपाः मवयेगुया संकेत जूगु खँ नं विज्ञ सूत्रं धाःगु दु ।

वय्कलं थ्व उपयुक्त ई गबलेपाखे जुइफु धइगु खँया सामान्य छनक तकं बिया मदी । उकिं चिनियाँ राष्ट्रपतिया नेपाः भ्रमण अझ नं तापाःगु हे विषय जुइ फइगु खँ नं सूत्रं धाःगु दु । उखे भारतीय प्रधानमन्त्री नरेन्द्र मोदी धाःसा थःगु कार्यकालय् स्वक्वः नेपाः वयेधुंकूगु दु । उकी मध्ये निगू भ्रमण ला ओलीया कार्यकालय् हे वःगु खः ।

चीनपाखें दकलय् उच्चस्तरीय भ्रमण जूगु धइगु थनिं खुदँ न्ह्यः खः । अबल् तत्कालिन प्रधानमन्त्री वेन जियाबाओं केवल न्याघौया लागिं नेपाः भ्रमणय् झाःगु खः । व नं तसकं अप्रत्याशित व आकस्मिक ढंगं ।

सूत्रतय् कथं चीनं नेपाःयात अझ नं भारतं ति महत्व मबिउगुया कारण चीनयात स्वयेगु नेपाःया दृष्टिकोण स्पष्ट मजूगुलिं खः । नेपाःया दृष्टिकोणयात चीनं अझ नं पत्याः याये मफुनिगु कारणं उमिसं नेपाःयात कम जक महत्व बिउगु खः ।
खास यानाः चीनं अति महत्वाकांक्षी ढंगं न्ह्यःने हयाच्वंगु वन बेल्ट वन रोड परियोजनायात नेपालं अझ नं खुल्ला रुपं स्वीकार मयाःनिगु कारणं चीन सशंकित जुयाच्वंगु दनि । नेपालं थ्व परियोजनायात पूर्ण रुपं स्वीकार मयाःगुया कारण भारत जुइमाः धइगु चीनया विश्लेषण दुगु खँ नं सूत्रं धाःगु दु ।

कनिष्ठपाखें लसकुस

चीन भ्रमणय् झाःम्ह प्रम ओलीयात बेइजिङया विमानस्थलय् विदेश मन्त्रालयया तसकं कनिष्ठ मन्त्रीं लसकुस याः वःगु खँय् नं भ्रमण दलया दुजःत असन्तुष्ट जूगु खँ सीदुगु दु । चिनियाँ विदेश मन्त्रालयय् दइपिं १२ म्ह सहायक मन्त्रीत मध्ये १२ औं नम्बरय् लाःम्ह सहायक मन्त्रीं वय्कःयात लसकुस याः वःगु खः । प्रम ओली भारत वंबलय् विमानस्थलय् वरिष्ठ मन्त्रीं लसकुस याः वःगु खः । तर चीनं कनिष्ठ मन्त्रीयात छ्वया हःगुलिं वय्कःयात चीनपाखें माःगु सम्मान मयाःगु अर्थय् थुइकूगु दु ।