धू व कुँ मिखा ल्वगित अप्वल

यल -स्वनिगलय् धू व कुं यानाः न्हियान्हिथं मिखाया ल्वगित अप्वया वनाच्वंगु खँ धाःगु दु । ताम्राकार समाजय् स्वास्थ्य उपसमितिया ग्वसालय् जूगु निःशुल्क मिखा शिविर व मिखा दान ज्याझ्वलय् नेपाल आँगा अस्पतालया मेडिकल डक्टर इन्द्रप्रसाद ढुंगेलं थ्व खँ धयादीगु खः । नेपाल आँखा अस्पताल व नेपाल आँखा दान समाजया सहकार्य व उग्रचण्डी सामुदायिक स्वास्थ्य केन्द्र चक्रवति त्वाःया सह आयोजनाय् थ्व ज्याझ्वः जूगु खः ।
ज्याझ्वलय् झिंस्वम्ह मोतिविन्दू जूपिं विरामी लुइकूगु खः ।

उमित आः निःशुल्क अपरेशन यानाः निःशुल्क चश्मा बीगु खँ उपसमितिया कजि मिला ताम्रकारं धाःगु दु । ज्याझ्वलय् न्ववासें समाजया नायः रविन्द्रराज ताम्रकारं दँय् निगू स्वंगू स्वास्थ्य शिविर व हिदान यानाः समाजं स्वास्थ्य ख्यःयात प्राथमिकता बियाः न्ह्याः वनाच्वनागु खँ कनादिल । यलया चक्रबहिली शनिवाः जूगु थ्व ज्याझ्वलय् पीम्ह दातातय्सं मिखा दान यानादीगु खः ।

ज्याझ्वलय् आँखा दान समाजया नायः जगन्नाथ महर्जनं नं न्ववानादिसें समाजं मिखा दान व मिखा बैंक नीस्वनेत थीथी ज्याझ्वः यानाच्वनागु खँ कनादीगु खः । थ्वयां न्ह्यः मिखा दान सम्बन्धी जूगु अभिमुखिकरण ज्याझ्वलय् ताम्रकार समाजया अध्यक्ष रविन्द्र राज ताम्रकार, आंखादान समाजया महासचिव साधुराम महर्जन, समाजसेवी मोति शान्ती शाक्य, उपसमितिया संयोजक मिला ताम्रकार, उपसमिति सदस्य रिद्धि ताम्रकारं मिखा दानया महत्व तथा आवश्यकता बारे न्ववानादीगु खः ।