ने. सं. ११४४ कौलाथ्व पारू - नःलास्वनेगु

हलिउड अभिनेता फ्रिम्यानयात पूर्वकुमारीया नेवाःभासं लिसः

नेपालभाषा टाइम्स
- मेमेगु
किपा-ग्वाहालि- लसन तुलाधर

येँ – हलिउडया नांजाःम्ह कलाकार मोर्गन फ्रिम्यानं पूर्व कमारी मतिना शाक्ययात नापलानादी दु । नेशनल जोग्राफिइ क्यनीगु ‘द स्टोरी अफ गड’ श्रृंखलाय् नेपाःया कुमारीया बारे नं क्यनेगु निंतिं फ्रिम्यानं पूर्वकमारी शाक्य लिसे खँल्हाबल्हा यानादीगु खः ।

अस्कर अवार्ड त्याकेधुंकूम्ह फ्रिम्यान हलिउडया तसकं लोकंह्वाःम्ह कलाकार खः । ‘इन्भिक्टस’ फिल्मय् दक्षिण अफ्रिकी नेता नेशनल मण्डेलाया भूमिका म्हितूम्ह फ्रिम्यान लिसे पूर्व कुमारी मतिनां नेवाः भासं खँल्हाबल्हा यानाबिज्याःगु खः । डकुमेन्ट्री प्रस्तोता फ्रिम्यानं इंग्लिसं न्यंगु न्ह्यसःयात पूर्व कुमारीं नेवाः भासं लिसः बियाबिज्याःगु खः । वसपोलया लिसःयात अनिल चित्रकारं उल्था यानाबिउगु खः ।

‘द स्टोरी अफ गड’ श्रृंखला द्यःया बारे मनूतय् धारणा न्ह्यब्वइगु डकुमेन्ट्री खः । फ्रिम्यानं पूर्वकुमारी मतिना लिसे कुमारी जुयागुया अनुभव, छेँजःपिनि बारे, थौंकन्हय् छु यानाच्वनागु धयागु खँल्हाबल्हा याःगु खँ मतिनाया अबुजु प्रतापमान शाक्यं कनादीगु दु ।

श्रृंखलाया टिम मतिना ब्वनाबिज्याइगु स्कुल ग्रीनपिस को–एड स्कुलय् नं वनेगु कार्यक्रम दयेकातःगु खःसां लिमलाःगुलिं अनया स्वम्ह मस्तय्त हे मतिनाय् छेँय् सःता हयाः सुटिङ्ग याःगु खः । मतिनाया छेँ, क्वथाया लिसें इतुंबहालय् सुटिङ्ग जूगु खः ।

श्रृंखलया पुचः यलया कुमारीयाथाय्, बौद्ध आदि थासय् नं वंगु खँ धाःगु दु । कुमारीया बारे क्यनीगु श्रृंखला गुबले प्रशारण जुइगु धयागु धाःसा जानकारी मबिउनिगु खँ भाजु शाक्यं कनादीगु दु । अभिनेता फ्रिम्यान नेपालय् सुटिङ्ग क्वचायेकाः सोमवाः लिहां वनेधुंकूगु दु ।