यातायात व्यवसायीपाखें कम्पनी दर्ता यायेत बेवास्ता

येँ – सरकारं यातायात व्यवसायीयात कम्पनी रुपान्तरण यायेगु धकाः धाःसां नं यातायात व्यवसायीं धाःसा उकियात वेवास्ता याना वयाच्वंगु दु । विशेष यानाः तःधंगु यातायात व्यवसायी समितिं थःपिंत कम्पनी दर्ता यायेगु चाहे मजुयाच्वंगु दु ।

तःधंगु यातायात व्यवसायीतय्सं थःपिनिगु अस्तित्व ल्यंकेगु निंतिं गुकथं वनेमाली धकाः सहलह यायेगु ज्या न्ह्याकाच्वंगु दुसा मेखे चीधंगु समिति धाःसा कम्पनी रुपान्तरण जुइधुंकूगु दु । तःधंगु यातायात व्यवसायीत थःपिंके दुगु अर्बौ तका ध्यबाया कारणं यानाः नं कम्पनी रुपान्तरण जुइत चाहे मजुयाच्वंगु खँ धाःगु दु ।

मेखे थःपिनिगु समितिया दर्ता खारेज जुल धाःसा संस्थाया ध्यबा फुुक्कं सरकारया नामय् वनीगु जुयाः नं यातायात व्यवसायीत कम्पनीइ रुपान्तरण जुइत चाहे मजुयाच्वंगु खः । संस्था दर्ता ऐन कथं छुं नं संस्था खारेज वा विघटन जुल धाःसा अज्याःगु संस्थाया फुक्कं कथंया सम्पत्ति सरकारी जुइगु व्यवस्था दु ।

संस्था दर्ता ऐन २०३४ या दफा १४ सं संस्थाया विधान बमोजिम कार्य सञ्चालन याये मफयाः वा छुं कारणं संस्था विघटन जुल धाःसा अज्याःगु संस्थाया फुक्कं कथंया जायजेथा नेपाल सरकारया जुइ धकाः च्वयातःगु दु ।