हस्तकला प्रवद्र्धन यायेत ‘कोसेली घर’

यल(नेपालभाषा टाइम्स)- यल महानगरपालिकां हस्तकला ज्वलंया प्रवद्र्धन व बजारीकरण यायेगु ल्याखं ‘यल कोसेली घर’ संचालनय् हःगु दु । यल महानगरं थःगु नगर दुने उत्पादन जूगु हस्तकला ज्वलंया प्रवद्र्धन यायेगु ल्याखं उगु यल कोसेली घर संचालनय् हःगु खः ।

यल महानगर प्रमुख चिरिबाबु महर्जनं यलध्वाखा लिक्कं संचालनय् हःगु कोसेली घरया शुभारम्भ यानादिसें कोसेली घरं विक्री याइगु हस्तकलाया हलंज्वलनं गुणस्तर कायम यायेमाःगु खँय् बः बियादीगु दु । वय्कलं कोसेली घरं विक्री याइगु हरेक सामग्रीइ गुणस्तरया प्रत्याभूति जुइमाः धासें अथे जुइ फुसा जक हरेक उत्पादनय् ‘मेड इन ललितपुर’या ट्याग नं तये उपयुक्त जुइ धयादिल ।

गुणस्तर कुहां वइगु ज्याय् गुगुंकथंया सम्झौता यायेगु जुइ मखु धासें यल महानगर प्रमुख महर्जनं धयादिल, ‘थौं कन्हय् यल देशय् दुहां वइपिं पर्यटकया ल्याः तसकं म्हो जुयाच्वंगु दु । वःपिं विदेशी पर्यटकयात नं ताःईतक थन तयातयेत महानगरपालिकां आपालं ज्या याना वयाच्वंगु दु । आवंलिं यल देशय् वइपिं पर्यटकयात यल कोसेली घरय् नं दुहां वयेगुकथंया व्यवस्था यायेगु जुइ ।’

यल महानगर उपप्रमुख मञ्जली शाक्यं कोसेली घर हस्तकलाया ज्वलं विक्री यायेगु निंतिं जक मखसे व्यवसायी, उद्यमी, हस्तकला उद्योगया प्रवद्र्धन व विकासयात नं ध्यानय् तयाः संचालनय् हयागु खः धयादिल ।

ललितपुर हस्तकला संघया अध्यक्ष रमेश सिंहं कोसेली घरं विक्री वितरण याइगु हलंज्वलंया रेखदेख व गुणस्तरीयता कायम यायेगु जिम्मेवारी संघ काइ धासें गुणस्तरीय व विश्वसनीयताय् गुगुं कथं नं म्होति वयेके बी मखु धयादिल ।

यल महानगरपालिकां महानगर क्षेत्र दुनेया हस्तकला ज्वलंया प्रवद्र्धन व पर्यटन ख्यःया विकासया निंतिं संघया व्यवस्थापनय् उगु कोसेली घर संचालनय् हःगु खःसा महानगरपालिकां नं हरेक वाःया शुक्रवाः व शनिवाः महानगरपालिका परिसरय् हे स्थानीय हस्तकला ज्वलंया विक्री अप्वयेकेत मेला नं संचालन याना वयाच्वंगु दु ।

नेपालभाषा टाइम्स

च्वमिया मेमेगु

• जुगि जातया आवासया समस्या
• मेलम्चीया लः वइगु अझं अनिश्चित
• बँ पसः तयेके हे मबीगु बालेनया अडान
• फणीन्द्रयात सिद्धिदास सिरपाः
• इहिपा ज्याझ्वलय् मिं नयाः सछिम्ह मल्याकं सित