शिक्षक गम्भीरमान मास्के मंत

येँ – नेपाल भाषाया बाखं च्वमि लिसें विश्व निकेटन हाइस्कुलया पुलांम्ह प्रधानाध्यापक गम्भीरमान मास्के म्हिगः मंत । म्हिगः पशुपतिया आर्यघाटय् वय्कःया दाहसंस्कार यायेगु ज्या क्वचाःगु दु । वय्कःयात तःधीम्ह काय सिद्धार्थं मि तःगु खः । मदुम्ह मास्कें २००९ सालपाखे डा. कमलप्रकाश मल्ललिसे जानाः विद्यार्थी साहित्य मण्डल नीस्वनादीगु खःसा उकिया अध्यक्ष मदुम्ह मास्के हे खः ।

विद्यार्थी साहित्य मण्डलं ग्वसाः ग्वइगु साहित्यिक ज्याझ्वःपाखें जनकवि दुर्गालाल श्रेष्ठ व फणीन्द्ररत्न वज्राचार्यपिंसं साहित्यिक यात्रा शुरु यानादीगु खः । मदुम्ह मास्के तःदँ न्ह्यवंनिसें सिनायल ल्वःमनिगु व मनू म्हसीके मफइगु ल्वच्वं कयाच्वंम्ह खः । वय्कःया नेपालभाषाया ‘म्हगसय् लुया वइम्ह’ बाखं सफू पिदंगु खः । मदुम्ह मास्केया काय निम्ह व म्ह्याय् छम्ह दी । वय्कः नांजाःम्ह कलाकार चन्द्रमान मास्केया काय खः ।