धर्मकीर्तिइ आङसाङ सूकी

येँ -केवल निन्हुया लागिं नेपाः भ्रमणय् झाःम्ह म्यान्मारया नेतृ मय्जु आङसाङ सूकी म्हिगः थनया धर्मकीर्ति विहारय् झायाः थः गुरु श्रद्धेय धम्मवती गुरुमांयात नापलानादिल । वय्कः एशिया प्यासिफिक सम्मेलनय् ब्वति कायेत नेपाः झाःगु खः । नेपाः वक्वपतिं धर्मकीर्ति विहारय् वनाः धम्मवती गुरुमां नापलायेगु ज्या वय्कलं यानादीगु दु ।

म्हिगः न्हिनय् कडा सुरक्षाया दथुइ वय्कः धर्मकीर्ति विहारय् झायाः धम्मवती गुरुमांयात नापलानादीगु खः । अन झायाः वय्कलं गुरुमांयात आदरपूर्वक पुलिं चुयाः पंचांग दण्डवत् यानादीगु खः ।

ज्याझ्वलय् थःगु बिचाः तसें मय्जु सूकीं भगवान बुद्धया जन्मभूमिइ च्वनेदुपिं नेपाःमित भाग्यमानी जूगु खँ कनादीगु खः । नेपाः व म्यान्मार दथुइ बुद्ध धर्मया अध्ययन यायेगु ज्या न्ह्यानां तुं च्वने माःगु बिचाः नं तयादिल । धम्मावती गुरुमां मय्जु सूकीया बारे वर्मी भासं हे नुगःखँ प्वंकाबिज्याःगु खः । लिसें मय्जु सूकी व वय्कःया वर्मा देशया भिं जुइमा धकाः परित्राण पाठ नं यानाबिज्यात ।

गुरुमांनं मय्जु सूकीयात विहारपाखें उपहार लःल्हानाबिज्याःगु खःसा मय्जु सूकीं विहारया लागिं दान प्रदान यानादीगु खः ।
मय्जु सूकी विहारय् करिब १ घन्टा च्वनादीगु खः । उगु इलय् येँ मनपाया मेयर विद्यासुन्द शाक्य, नेपाःया निंतिं वर्माया राजदूत, येँ २५ वडाया अध्यक्ष निलकाजी शाक्यलिसें धर्मकीर्ति विहारया पदाधिकारीपिनि उपस्थिति दुगु खः ।

सीदु कथं मय्जु सूकीं म्यान्मारय् हे थःगु नेपाः भ्रमणया इलय् धर्मकीर्ति विहार नं वनेगु इच्छा यानादीगुलिं नेपाः सरकारं उकिया लागिं सुरक्षा सहित पबवन्ध याना बिउगु खः ।