चितवन एमालेमय

चितवन – थनिंनिसें शुरु जुइगु नेकपा (एमाले) या झिक्वःगु तःमुँज्याया झ्वलय् मुक्कं चितवन जिल्ला एमालेमय जूगु दु । थाय्थासय् ध्वाँय् व गेट दयेकातःगु लिसें म्हिगःनिसें कार्यकर्तात नं वयेगु शुरु जूगुलिं जिल्ला हे एमालेमय खने दुगु खः ।

तःमुँज्याय् ब्वति कायेत पार्टी अध्यक्ष केपी ओली म्हिगः हे चितवन थ्यंकादीगु दुसा पार्टीया सकलें धइथें वरिष्ठ नेतात थन थ्यंकः वःगु दु । अथे हे थीथी देशं सःतातःपिं विदेशी पाहांपिं नं थ्यंकः वःगु दु ।
तःमुँज्याय् ब्वति काइपिं कार्यकर्तां यानाः चितवनया फुक्क हे होटल व लज जायाच्वंगु दु । नारायणी खुसि जःखः च्वनेथाय् मदयाः मनूत २२ किलोमिटर तापाःगु मेघौली तक वनाः बाय् च्वनाच्वंगु दु ।

थौं जुइगु तःमुँज्या उलेज्याय् ५ लाख कार्यकर्तां ब्वति काइगु खँ धाःगु दु । थुकिया लागिं नारायणी खुसिया सिथय् विशेष कथंया दबू दयेकूगु दु । दबुली जक हे ५०० म्ह मनू दइगु खँ धाःगु दु । उलेज्या समारोहय् तक वयेत थनया थीथी थासं जुलुस पिकायेगु ग्वसाः जुयाच्वंगु दु ।

पिने जिल्लां वइपिं मनूतय्गु गाडीं सतक जाम जुइफु धकाः नारायणघाटं बुटवल वनेगु राजमार्ग हे थौं न्हिछि चछिया लागिं अत्यावश्यक गाडी बाहेक मेपिंत बन्द याना बिउगु दु ।