न्हू सतकय् मिसा मचा बलात्कार यायेत्यंगु द्वपनय् ज्वन

येँ – येँया न्हू सतकय् छम्ह मिसा मचायात बलात्कार यायेत्यंगु द्वपनय् छम्हेसित ज्वंगु दु । प्रहरीया कथं वंगु शनिवाः च्यादँ दुम्ह मिसा मचायात बलात्कार यायेत्यंगु द्वपनय् सूर्य तामाङयात ज्वंगु खः । तामाङं पुलांगु नगरपालिका दुगु थासय् म्हिताच्वंम्ह मचायात बलात्कारया कुतः यानाच्वंगु स्थानीय वासिन्दां खनेवं ज्वंगु खः । वं अन दिकातःगु गाडीया लिउने यंकाः मिसा मचायात बलात्कार यायेत्यंगु खँ स्थानीय वासिन्दां धाःगु दु । प्रहरीया कथं तामाङं घटनाया इलय् अय्लाः त्वनातःगु खःसा व न्हापां नं थीथी अपराधय् सार्वजनिक मुद्दा फयेधुंकूम्ह मनू खः ।