सेनालिसे ख्वनाया अन्तक्र्रिया

येँ -फास्ट ट्रायक दयेकेगु झ्वलय् ख्वनाया वासिन्दायात उचित कथं क्षतिपूर्ति बीगु बचं रक्षा मन्त्री ईश्वर पोखरेलं बियादीगु दु ।
म्हिगः ख्वना व बुंगया स्थानीय वासिन्दा लिसे आर्मी अफिसर्स क्लबय् जूगु सहलह ज्याझ्वलय् न्ववायेगु झ्वलय् वय्कलं उगु बचं बियादीगु खः । ख्वनाया सम्पदायात ल्यंकेमाःगु खँय् सरकार सचेत जूगु खँ कनादिसें उकिया निंतिं नं थम्हं मन्त्रिपरिषदय् प्रस्ताव यायेगु खँ वय्कलं कनादिल । वय्कलं समस्या ज्यंकेगु निंतिं आन्दोलन उचित मजूगु खँ कनादिसें सहलहपाखें समस्या ज्यंकेमाःगु खँ कनादिल ।

सहलहय् न्ववायेगु झ्वलय् उगु क्षेत्रया सांसद लिसें माओवादीया प्रवक्ता पम्फा भुसालं ख्वनाया सम्पदा नष्ट जुइ कथं फास्ट ट्रायक दयेके मजिउगु खँय् बः बिसें आः दयेकेगु लँ मेगु हे थासं यंकेमाःगु खँ कनादिल । वय्कलं ख्वना व बुंगयात केन्द्र दयेकाः आउटर रिङरोड लिसें थीथी आयोजना वयाच्वंगु खँय् विरोध प्वंकादिसें आउटर रिङरोड आः प्रस्ताव याःगु थाय् स्वयां १० किलोमिटर तापाक दयेकेमाःगु खँय् बः बियादिल । वय्कलं धयादिल, ‘च्यागू च्यागू मछि आयोजना ख्वना व बुंगय् जक केन्द्रित यायेगु खःसा ला थनया जनता दक्वं फ्वगिं जुयाः वनेमाली ।’

सहलहया झ्वलय् सेनां दयेकेत्यंगु द्रुतमार्ग सम्बन्धी जानकारी सेनाया रथि पूर्णचन्द्र थापां बियादीगु खःसा ज्याझ्वलय् प्रधानसेनापति राजेन्द्र क्षत्री नं सहभागी जुयादीगु खः । ज्याझ्वः सांसद पम्फा भुसालया विशेष कुतलय् जूगु खँ धाःगु दु । ख्वनाया स्थानीय जनतां थ्व स्वयां न्ह्यः नं सेनालिसे संवाद याना वयाच्वंगु दु ।