तुकुचा खुसि उत्खनन पुरातत्व विभाग अध्ययन याइगु
येँ (नेपालभाषा टाइम्स)- येँ महानगरपालिकां हात्तिसार क्षेत्रय् भूमिगत यानातःगु तुकुचा खुसि उत्खनन् यायेवं पुरातत्व विभागं चिउताः क्यंगु दु । विभागं नारायणहिति दरबार क्षेत्र पिनया जननेपाल हलनिसें काठमाडौं प्लाजा तक परम्परागत प्रविधिं भूमिगत यानातःगु तुकुचाया पुरातात्विक पूर्वाधार बारे पुरातत्व विभागं अध्ययन यायेत्यंगु खः ।
विभागया प्रवक्ता रामबहादुर कुँवरया कथं महानगरं उत्खनन यानाच्वंगु पूर्वाधार बारे अध्ययन यायेत छगू पुचः खते यानागु खँ धयादीगु दु । वय्कःया कथं अध्ययन पुचलं थःगु अध्ययन क्वचायेकाः भूमिगत यानातःगु क्षेत्रया पूर्वाधार बारे प्रतिवेदन बी ।
तुकुचा खुसि भूमिगत यायेत दयेकातःगु पूर्वाधार पुरातात्विक महत्वया जुइफइगु अनुमान यासें पुरातत्व विभागं अनुसन्धान न्ह्याकेत्यंगु खः । पुचलं तुकुचा खुसि भूमिगत यायेत दयेकूगु गुम्बज शैलीइ आधारित अप्पां दयेकातःगु पूर्वाधारया ऐतिहासिकता अध्ययन याइगु खँ धाःगु दु । थ्यं मथ्यं १३० दँ न्ह्यः राणा प्रधानमन्त्री वीरशम्शेरं भूमिगत यानातःगु अनुमान यानातःगु दु ।
सछि दँस्वयां पुलांगु सम्पदायात विभागं पुरातात्विक वस्तु व सम्पदाया रुपय् सूचीकृत यायेगु याना वयाच्वंगु दु । थज्याःगु सम्पदायात प्राचीन स्मारण संरक्षण ऐन कथं संरक्षण यायेमाःगु दायित्व पुरातत्व विभागया खः ।
खुसि भूमिगत यानातःगु भूमिगत संरचना काणा कालया इन्जिनिययरिङया नमूना जूगु धासें संस्कृति सम्बन्धी चिउताः प्वंका वयाच्वंपिसं संरचना थुने मजिउ धासें उकियात संरक्षण यायेमाःगु माग याना वयाच्वंगु दु । थीथी सामाजिक सञ्जालय् नं अप्वां दयेकातःगु पूर्वाधार संरक्षण यायेमाःगु माग जुयाच्वंगु दु । थ्व पूर्वाधार गबलय् दयेकूगु व थुकिया ऐतिहासिकयात कयाः नं छुं खँ स्पष्ट मजूगुलिं विभागया पुचलं उगु पूर्वाधारया अध्ययन यानाः थुकिया बारे प्रतिवेदन बीधुंकाः उकियात छु यायेगु धइगु बारे निर्णय याइगु खँ विभागं धाःगु दु ।
खुसियात भूमिगत यानाः उकिया द्यःने पूर्वाधार दयेकातःगु दु । येँ महानगरपालिकां खुसिया द्यःने छेँय् दयेकूगु धासें उकियात थुनेगु निर्णय यानाः अझ नं तुकुचा खुसि मालेगु ज्या न्ह्याकाच्वंगु दु । मेखे उच्च अदालत यलं नं तत्कालया नितिं उत्खनन यायेगु ज्या यायेमते धकाः येँ महानगरपालिकायात विरुद्ध अन्तरकालीन आदेश जारी यायेधुंकूगु दु ।
LEAVE YOUR COMMENTS