‘राष्ट्रपतियात गाडी म्वाःला ?’

येँ – सरकारं राष्ट्रपति व उपराष्ट्रपति बारे थौंकन्हय् अनावश्यक विवाद ब्वलंकूगु धासें उकिया बचाउ याःगु दु । म्हिगः सरकारया प्रवक्ता लिसें सञ्चारमन्त्री गोकुल बास्कोटां सञ्चार मन्त्रालयय् पत्रकार सम्मेलन यानाः राष्ट्रपति व उपराष्ट्रपतिया बचाउ यानादीगु खः ।
पत्रकार सम्मेलनय् न्ववायेगु झ्वलय् प्रवक्ता बास्कोटा राष्ट्रपतिया गाडीया सवालय् न्ववायेगु झ्वलय् धयादी, ‘राष्ट्रपति व उपराष्ट्रपतियात अनावश्यक विवादय् सालेगु ज्या जुल, छु राष्ट्रपति साइकल हे चले यायेमाःगु खः ला ?’

वय्कलं राष्ट्रपतिया निंतिं न्यायेत्यंगु छगः गाडीया १८ करोड तुइगु मखुसें बुलेट प्रुफ गाडीया लिसें न्ह्यःने लिउने वनीगु गाडी व एम्बुलेन्सया निंतिं गाडी न्यायेगु तयारी यायेत्यनागु तर्क बियादिल ।

गाडीया विषयय् राष्ट्रपतिया सुरक्षाया विषय जूगु तर्क बिसें सञ्चारमन्त्री बास्कोटां गणतन्त्रयात कमजोर यायेगु कथं थज्याःगु आलोचना जूगु खँ कनादिल । वय्कलं राष्ट्रपतिया सुरक्षा सुनां यायेगु धइगु न्ह्यसः तयादिसें राष्ट्रपति व उपराष्ट्रपतिं व माल थ्व माल धकाः आः तक मधाःगु व लोकतन्त्र व गणतन्त्रयात कमजोर यायेत नकारात्मक प्रचार यानाच्वंगु व उकियात सरकारं दुवालाच्वनागु खँ कनादिल ।

वय्कलं गाडी न्यायेगु विषय धइगु यक्व न्ह्यःया जूगु धासें गणतन्त्र स्थापना लिपा राष्ट्रपति व उपराष्ट्रपतिया निंतिं गाडी न्यायेगु ज्या मजूगु धासें वय्कःपिंत गाडी म्वाःला धकाः अःखः न्ह्यसः तयादिल । गाडीया बारे सार्वजनिक लेखा समितिं नं छानविन यानाच्वंगु दु ।
अथेहे मन्त्री बास्कोटां प्रहरी प्रतिष्ठानया जग्गाया बारे नं सरकारया बचाउ यानादीगु दु । मन्त्री बास्कोटां धयादी, ‘प्रहरी प्रतिष्ठानया जग्गा सरकारया खः । थुकियात सरकारं चले याये दइ, प्रहरी प्रतिष्ठान म्वाःगु मखु । थप व्यवस्थित यायेत पन्तिइ ८०० रोपनी जग्गा फ्याना तयागु दु ।’

सम्बन्धित बुखँ

LEAVE YOUR COMMENTS